Dapi radund in mais organisescha la fundaziun «Tür auf – mo vinavon» ensemen cun la Baselgia evangelica da la Cadi mangiativas sur la rait da l’uniun «Tischlein Deck Dich». En cumparegliaziun cun las purschidas ordinarias na dovri a Mustér nagins documents uffizials per pudair nizzegiar la purschida. Uschia pon er fugitivs cun in status F retrair mangiativas a moda nuncumplitgada, argumentescha il plevon Christoph Zingg. A Mustér èn quai il pli savens fugitivs ucranais cun dimora en il center da transit Bellavista.
Christoph Zinng ha experientscha d'organisar talas purschidas, perquai ch’el ha gidà a fundar avant blers onns l’emprima purschida da l’uniun «Tischlein Deck Dich». Ch'il basegn è avant maun mussan las radund 50 persunas che vegnan regularmain en il center Aua Viva a Mustér per retrair las mangiativas.
Indigens na vegnan betg
Fin uss na collavureschan els anc betg cun il servetsch social. En pli abitescha la gronda part da las persunas ch’avessan il dretg da vegnir e retrair mangiativas a Glion, di Christoph Zingg.
Ma el speria fitg che la societad vegnia da surmuntar pregiudizis en connex cun paupradad. La paupradad na saja betg in resultat da marschadetgna u da betg vulair lavurar, savens sajan pliras circumstanzas responsablas per in destin tragic. El speria fitg che las persunas che basegnan sustegn chattan era quel, n’emportia betg nua.
Betg mo gidar cun tschaveras
Zingg fa quitads d’ina vart causa l’inflaziun che metta en privel existenzas e da l'autra vart che adina dapli fugitivs arrivan en Svizra e basegnan sustegn. Cun l’agid da tuts vegnan els a sclerir nua ch’ins po gidar, per exempel cun porscher maun da chattar plazzas da lavur.