Sch'ins patratga vi da la cuschina dad auta qualitad, vegnan endament nums sco Gault Milliau ubain Guide Michelin. In'ulteriura, betg main enconuschenta organisaziun è la Gilda, ina organisaziun gastronomica fundada l'onn 1954. L'organisaziun vala sco uniun professiunala da la gastronomia svizra. Tar lur criteris tutgan qualitad, creativitad ed ospitalitad. Daventar commember da la Gilda pon manaschis che vegnan proponids da commembers ubain manaschis che sa laschan testar tras expertas ed experts.
Toni Darms, anteriur ustier da la Stiva Veglia a Schnaus, è stà blers onns ambassadur da la «Gilda Grischa» dal Grischun. Sco commember da la Gilda ha Darms adina puspè controllà e testà manaschis en il chantun da Son Gagl. Er sch'i haja dà magari critica cun far attent sin ina u l'autra chaussa che na consteva betg:
Jau n'hai mai stuì sclauder insatgi da la Gilda.
Insatge che saja dentant era gia capità è ch'in manaschi n'e betg vegnì acceptà en la Gilda.
Bain inqual commember da la Gilda è era il medem mument commember dad autras organisaziuns sco Gault Milliau u Guide Michelin. Per Toni Darms nagin impediment. El discurra schizunt d'ina chaussa giavischada dad esser commember en pliras organisaziuns.