Siglir tar il cuntegn

Header

video
Placi Giusep Pelican – in dals ultims che fa «Caschiel da matg»
Or da Telesguard dals 05.06.2020.
laschar ir
cuntegn

Tradiziuns veglias Il davos «caschiel da matg» da Surrein

Il mais da matg è sontg per Placi Giusep Pelican da Surrein. Sco in dils davos cultivescha el sin sia tegia sur Surrein la veglia tradiziun da far chaschiel matg.

Malgrà che Placi Giusep Pelican ha fatg sco blers auters signuns d’alp il curs da chaschar al Plantahof, emprais a chaschar ha il tschentapignas gia sco giuvenot da ses bab, e quai il chaschiel da matg.

Il num porta il chaschiel cun quai ch’el vegniva fatg da primavaira cur che tuts na pudevan betg spetgar sin frestg chaschiel Igl ‘era però massa baud per ir cun las vatgas ad alp. Uschè fava mintga pur sin sia tegia tranter vitg ed alp il chaschiel matg.

E quel chaschiel ha fascinà Placi Giusep Pelican fin al di dad oz. Enstagl dad apparaturas modernas, atschal cromà ed agids mecanics è far chaschiel da matg en l’atgna tegia ina tradiziun che vegn cultivada gia dapi tschientaners.

Curters, fieu e musculs

Quai che fascinescha il pli ferm è il chaschar cun iseglias da lain. Curters che tiran la groma or dal latg, sgramar cun ina gronda palutta da lain, stgaudar la chaldera cun pigns or dal guaud sper tegia. E quasi tut senza agid mecanic. Sulet maschadar il latg en la chaldera surpiglia in mixer cun forza solara.

La groma or dad in curter gusta tut auter che quella ch’ins gudogna cun centrifugar il latg.
Autur: Placi Giusep PelicanSurrein

Era la muntada dal chaschar fascinescha Placi Giusep: La necessitad da conservar il latg cun far chaschiel, ma era far pischada che serviva sco grass per cuschinar.

Mo per diever persunal

Cun quai che las leschas dad igiena èn vegnidas adina pli severas vess Placi Giusep stuì modernisar sia pitschna chascharia e desister sin curters da lain per accumplir ils standards d’ozendi. In pass ch’el n’è betg stà pront da far. Il chaschiel na dastga el u ils purs betg pli metter en la vendita. Il gust spezial vegn però stimà da tuts, uschia ch’ils purs da la regiun vulan vinavant il chaschiel da matg, mo per diever privat.

Grazia quel sustegn dastga Placi Giusep Pelican tgirar vinavant la veglia tradiziun da far chaschiel matg.

RTR Telesguard 17:40

Artitgels legids il pli savens

Scrollar a sanestra Scrollar a dretga