Per il chantun saja stà impurtant da survegnir ina sentenzia d'in tribunal en chaussa, declera cusseglier guvernativ Mario Cavigelli. Ma quai na saja betg reussì propi, la sentenzia portia dapli dumondas che respostas. La buna vart da la sentenzia saja che la dretgira constateschia che pliras dumondas na sajan betg scleridas e ch'in discurs tranter ils uffizis chantunals e federals saja indispensabels, per pudair agir en futur, uschia Cavigelli.
Quai saja era ina porta che s'avria e quella stoppian ins uss prender per sclerir la problematica e survegnir directivas cleras co che la lescha nova possia vegnir applitgada. Ma i dovria chapientscha da tuttas varts, era da la Confederaziun. Il chantun sez saja conscient che surtut l'agricultura stoppia savair co ch'ins veglia agir cun la preschientscha dal luf, ma betg sulet lezza, era il turissem e la segirtad generala da la populaziun saja tangada da la preschientscha dal luf. I saja uss il pensum da la regenza da far attent la Confederaziun cuntinuadamain sin quest fatg, uschia il cusseglier guvernativ Mario Cavigelli.
Lufs pitschens na dastgan betg vegnir sajettads
La stad 2021 aveva il triep da Stagias stgarpà 11 nursas sin l'Alp Lavaz sur Mustér. Sin fundament da quella situaziun vuleva l'Uffizi da chatscha e pestga dal Grischun regular il triep cun sajettar trais lufs giuvens. Quella dumonda ha l'Uffizi federal d'ambient refusà il settember 2021 cun ina disposiziun.
Il punct da dispita tranter l'Uffizi federal d'ambient ed il chantun tracta la dumonda quant lunsch che singulas nursas dastgan esser ordvart la saiv da notg. Da principi ston las nursas esser la notg sin ina surfatscha ch’è maximal 5 hectaras gronda. Singulas nursas ch’ils pasturs na dumognan betg en la saiv dastgan tenor l'uffizi federal avair maximal 125 meters distanza da la saiv per ch’ellas valian en in cas d’ina attatga da lufs anc sco protegidas.
Il chantun percunter è da l'opiniun ch’ils lufs na san sin bleras alps betg attatgar las nursas da tuttas varts. Perquai na stoppia la protecziun betg circumdar l’entira saiv, mabain sulet la direcziun da la quala ils lufs fan l’attatga. Persuenter duess la distanza da las nursas ordvart la saiv dastgar esser pli gronda che 125 meters.
Segund Na
Il Tribunal administrativ federal a Son Gagl ha renvià il recurs dal chantun Grischun, uschia che l'Uffizi da chatscha e pestga na dastga betg sajettar ils lufs giuvens dal triep da Stagias. Encunter quella decisiun sa il chantun anc far recurs tar il Tribunal federal svizzer.
