Siglir tar il cuntegn

Header

Video
sil punct – en visita tar las deserturas
Or da sil punct dals 05.07.2019.
abspielen
cuntegn

Triep da vatgas scappà L'istorgia da las deserturas cun quatter chommas

Cun la chargiada sin l'alp Nadels avant duas emnas avevan las difficultads gia cumenzà. Lura era sa fatg ord la pulvra in triep da dudesch vatgas da la Bassa.

Da 12 haja dà 10 e lura anc 8 ...

Per duas dad ellas n’ha la libertad betg cuzzà ditg: Ellas èn cupitgadas ed han stuì vegnir durmentadas. Las ulteriuras diesch èn puspè scappadas ed eran en ils culms sut l'alp Nadels. Uss hai puspè tutgà a duas: Da las diesch vatgas restantas han duas cumenzà da sa depurtar talmain agressiv ch’ellas han stuì vegnir sajettadas:

Uss èn anc otg vatgas en libertad – u sin la fugia. Ellas n’èn betg agressivas, plitost tementadas. Ins fetschia meglier da betg s’avischinar ad ellas. Quai di l’expert per prevenziun d'accidents e segirtad en l’agricultura e responsabel per las alps, Heinz Feldmann.

La situaziun a Trun Nadels saja bain extraordinaria, ins dastgia dentant betg survalitar ella, di l’expert.

Deserturas vegnan carmaladas puspè en tgira umana

Pertge che quai saja capità sappia avair pliras raschuns. Dad eruir exactamain, pertge che las 12 vatgas han survegnì la panica possian ins strusch eruir. Uss preparan ils purs ensemen cun l’expert il transport da las otg vatgas restantas. Per che las deserturas chattan puspè enavos en la tgira umana dovri uss inschign e quietezza.

La saira è l'aventura ida a fin

Vers saira han ils purs savì chargiar las otg vatgas e spedir ellas puspè giu la Bassa. Quai ha Thöni Gujan, il responsabel dal Plantahof per tut ils fatgs da vatgas mamma, communitgà a RTR.

RR novitads 12:00+