A la suprastanza è dà en egl ch’i vegnia salidà pli e pli pauc en il vitg. Da quella opiniun èn era intgins passants ed abitants da Trin. Cunzunt era uffants da scola na salidan betg la glieud. Perquai è il menader da scola, Christian Erni, era immediat sa declerà pront da segidar tar quest project.
Salidar era en scola
La scola integrescha il salidar era en las lecziuns. Uschia emprendan ils uffants da la scola primara da salidar sin quaranta differens linguatgs. Era usits e spezialitads vegnan tematisads. Plinavant zambregian els placats e malegian bandieras cun ils salids en differentas terras. Uschia speran ils da Trin ch'il salidar na giaja betg a perder e che negin giaja pli en il futur cun il chau a bass senza salidar in l’auter.