La cursa populara «Trofea Péz Ault» è ina cursa per skis da turas, che ha quasi schon tradiziun. Perquai hajan els er fatg tut il pussaivel per organisar la cursa quest'onn, uschia Giochen Bearth, il president dal comité d’organisaziun. Las mesiras actualas cun la regla da 3G sajan quasi las pretensiuns minimalas – e la gronda part da las persunas enconuschan gia las reglas. Uschia sajan er ils resuns ch'ins haja survegnì fin uss positivs. Ils blers sajan cuntents che la cursa vegn organisada, di Giochen Bearth ch’è stà blers onns schef da cursa e ch’è uss per l’emprima giada a la testa dal comité d’organisaziun.
Cursas durant dus dis
Per l’emprima giada vegn la cursa organisada sur dus dis cun in vertical – ina cursa che maina sulet ensi. Il di suenter datti la cursa tradiziunala, di Giochen Bearth. Quantas persunas che vegnan a s’annunziar na possian ins anc betg dir, cun quai che la pussaivladad d’annunzia saja pir uss activada. La situaziun cun ils voluntaris na saja probabel betg in problem. Ins haja ina buna gruppa da voluntaris, ma els sajan adina a la tschertga da dapli persunas che vulan gidar.
Naginas cursas professiunalas
Suenter che la «Trofea Péz Ault» aveva organisà il 2018 cursas professiunalas da turas, era vegnì svelt la dumonda d’organisar dapli cursas sumegliantas a Mustér. Ma la tschertga da sponsurs saja en ina situaziun da pandemia propi difficila. Uschia na possian ins betg dar ina garanzia als sponsurs che la cursa vegn era manada atras. Ord respect envers ils sponsurs hajan ins decidì da betg organisar per exempel il final da la cuppa mundiala, di Giochen Bearth. Ma quai na veglia betg dir ch’els na vegnian en il futur betg ad organisar cursas internaziunalas – simplamain il mument betg. Tuttina veglian ins nizzegiar il boom da far turas da skis ed etablir Mustér sco destinaziun e lieu da cursas da skis da turas.