Sport e divertiment – quai vulan ils organisaturs porscher als uffants e giuvenils. Perquai cuntegn la concurrenza cun las cursas singulas e las staffettas elements dal ski cross.
La concurrenza, il cumbat in encunter l’auter, na duai betg esser en il center.
Promover il sentiment da cuminanza
Ed en quest connex menziunescha il president dal comité d’organisaziun Roger Alig era las staffettas che duain promover il sentiment da gruppa e da cuminanza, quai surtut era perquai che uffants e giuvenils da diversas regiuns pon esser ensemen en ina staffetta.
Ina sfida organisatorica
Il dumber dals uffants e giuvenils che vegnan cun gidanters e geniturs saja ina sfida organisatorica per Trun. Per quels stoppian els organisar per exempel il gentar en halla dad ina gronda scrinaria.
Nus n'avain betg ina infrastructura ch’ins po dir: Vus pudais vegnir en quest e quest local.
Per motivs organisatorics n'hajan els era betg fatg las concurrenzas en dus dis, sche gea che quai saja stà previs a l’entschatta, di Roger Alig. Trun na saja betg in center turistic.
Las concurrenzas cumenzan da las 10:00 cun las cursas singulas en stil liber. Las staffettas èn a las 14:00 sin il program. Il di grischun dal pass lung vegn organisà dal club da skis da Trun ensemen cun l’uniun grischuna da skis.
RTR actualitad 17:00