Surtut ils onns da 1960 e 1970 è il Rain vegnì chanalisà. La finamira era d’impedir che l’aua giaja surora. Ma dapi intgins onns datti projects per renatiralisar il Rain. Uss savess era la vischnanca da Trun realisar in tal. En quatter lieus duai il letg dal flum vegnir meglierà e mirs e rempars allontanads.
Quai na vul dentant betg dir ch’ins sminuescha la segirtad. Il Rain na duai betg chaschunar donns.
Sanar deponias
En il conturn dal campadi è era l’ogna, che stat sut protecziun naziunala, pertutgada. Ma i saja giavischà ch’ins pudess duvrar il spazi da viver per ex. cun construir sendas e pins, di il president da vischnanca da Trun Dumeni Tomaschett. Plinavant pudess ins era sanar deponias, sche quai fa da basegn. Terren agricul n'è dentant betg pertutgà.
Finanzià da Ovras electricas da Turitg e dal maun public
Il project ha surtut era in aspect economic:
Sch’ins vegn dad investir en noss intschess da vischnanca 10 milliuns, sche è quai segir in fatg legraivel.
La vischnanca surpigliass 40’000 francs sco contribuziun da solidaritad. La gronda part da la summa d’investiziun vegn pajada dad in fondo da las Ovras electricas da Turitg, dal chantun Grischun e da la Confederaziun. Uss sto il project per renatiralisar il Rain vegnir concretisà. L’ultim pled en chapitel han votantas e votants da Trun.
RTR actualitad 07:00