Siglir tar il cuntegn

Header

audio
Lescha polizia procura per discussiuns en il parlament
Or da Actualitad dals 19.04.2022.
abspielen. Laufzeit 3 minutas 5 Sekunden.
cuntegn

Trun Gronda discussiun pervi da lescha da polizia

Cun la lescha da polizia duai per exempel vegnir reglà il temp da ruaus. Uschia na possian ins betg cumenzar a segar il pastget, cun segapastget gia avant las set la bun'ura, prevesa la lescha. Ma tals puncts han dà da discutar, perquai ch'ins na possian lura er betg cumenzar a rumir la naiv avant las set, uschia l'argument. Er è vegnì crititgà che plirs puncts en la lescha nova sajan gia ordinads cun leschas superiuras e na basegnian betg da vegnir reglads en ina lescha communala. Suenter ina debatta d'entrada viva, è il parlament lura tuttina entrà en la fatschenta.

Pliras propostas

Sinaquai ha il parlament tractà mintga artitgel da la lescha nova. Pliras midadas èn vegnidas fatgas a bucca e la finala ha il parlament votà davart quellas. La gronda part è dentant suandada las propostas da la suprastanza. Suenter in lung temp da tractanda ha il president dal cussegl communal, Mario Lechmann, decis dad interrumper la tractanda e cuntinuar en il medem lieu la proxima sesida. Tuttas proximas propostas per midadas han uss da vegnir inoltradas a scrit, quai che fetschia pli simpel il tractament da la lescha, uschia l'argument principal. Anc betg discutà ha il parlament sur dal scumond da fieus artifizials sin intschess communal, ed er betg davart las traplas fotograficas che duain vegnir scumandadas sin l'entir intschess public communal.

Quint serra cun surpli

Vinavant ha il parlament da la vischnanca da Trun approvà il quint communal dal 2021. Quel serra cun in surpli d'entradas da radund 730'000 francs, il cash-flow, il gudogn avant las amortisaziuns, munta ad 1,31 milliuns francs. Il daivet per abitant munta uss radund 2'000 francs.

RTR novitads 06:00

Artitgels legids il pli savens

Scrollar a sanestra Scrollar a dretga