La setgentera solara da gliet a Zignau è stada en funcziun quasi 20 onns. L’idea era d’evitar transports en direcziun Cuira cun il material restant da las sereneras en Surselva. Uschia è la cooperaziun intercommunala naschida.
Ils emprims onns èsi stà necessari d'evaluar ils problems cun las maschinas ed alura è la setgentera funcziunada bain, scrivan ils responsabels en il messadi. Ma ils ultims onns è la situaziun cun tuffien vegnida adina mendra, uschia che la suprastanza da Trun è adina pli savens stada confruntada cun reclamaziuns.
Dustar il material
Suenter evaluar pliras propostas ed ideas è la conclusiun ch’ils transports en direcziun Cuira èn pli favuraivels che d’installar in nov sistem da ventilaziun per sminuir las odurs malempernaivlas. Perquai han ils delegads da las vischnancas decis da schliar la cooperaziun ed uschia megliurar la situaziun per las vischinas ed ils vischins da Zignau e Tiraun, dus vischinadis da Trun. Quai ha alura era il parlament da Trun fatg e decis unanim da schliar la setgentera.
Nova lescha da protecziun da la populaziun
Era approvà unanimamain ha il parlament da Trun la nova lescha per la protecziun da la populaziun. La midada centrala è da distgargiar las responsabladads dals singuls represchentants en il stab da crisa e surdar quella a la vischnanca. La lescha nova n’ha betg dà da discutar. Era betg da discutar ha la surdada dal plaz da ballape en dretg da construcziun per mauns dal club da ballape Trun-Rabius dà. Quella è vegnida surdada per realisar in nov cundriz d’illuminaziun e uschia survegnir daners dal chantun, uschia è vegnì orientà a la radunanza dal parlament da glindesdis saira.
Cussegl communal en localitads istoricas
Per l’emprima giada ha il parlament da Trun tegnì sia sesida en la sala da dretgira da la Cuort Ligia Grischa a Trun. La presidenta dal parlament Flurina Bundi Steiner ha manà sia emprima sesida sco presidenta.