Siglir tar il cuntegn

Header

audio
Trun: Baselgia Nossadunna da la glisch vegn sanada per in milliun
Or da Actualitad dals 09.10.2021.
laschar ir. Durada: 02:54 minutas.
cuntegn

Trun In milliun francs per renovar Nossadunna da la glisch

La baselgia sin la terrassa ad Acladira sur Trun sto vegnir renovada. Per rimnar daners ha la plaiv tramess in figl sgulant en las chasadas da la regiun.

Renovar tetg, fatschada e fundaments

L’ultima giada è la baselgia da Nossadunna da la glisch vegnida renovada da 1989 – 1991. Dapi alura ha il bajetg – che stat sut protecziun chantunala e federala – patì da l’aura. Per quest motiv vegn l’extern da la baselgia renovà, surtut ils fundaments e la fatschada. E sco Pieder Decurtins, il president da la plaiv da Trun, di, vegn il tetg remplazzà ed era il plaz avant baselgia vegn sanà. Il project custa var in milliun francs, las lavurs duain cumenzar la primavaira 2022.

Legenda: Surtut tetg, fatschada e fundaments ston vegnir renovà RTR, Hubert Giger

Lieu da pelegrinadi 

La baselgia da Nossadunna da la glisch è enconuschenta sco lieu da pelegrinadi. Gia avant tschient onns vegniva la glieud da l’entira Surselva ad Acladira per rugar tar Nossadunna. Ils megliers onns haja questa baselgia gì dal temp che sur Carli Fry è stà là (1929-1954), di Pieder Decurtins.

Il num «Nossadunna da la glisch» ha in connex cun l'eveniment da 1663. Cura ch’il crap da fundament era vegnì mess ils 27 d’avrigl, saja il crest vegnì sclerì la notg dad ina glisch. En baselgia dat surtut in fresco en egl: L'artg da triumf cun Maria, la mamma da Jesus, che sesa sin in char. Quel vegn tratgs da Benedictins, ordavant sontg Benedetg, il fundatur da l'urden.

RTR actualitad 07:00

Artitgels legids il pli savens

Scrollar a sanestra Scrollar a dretga