«Oz avain nus ruaus ed il persunal è fitg motivà», resumescha la maina chasa Anna Jäger. En la chasa vivan actualmain 58 persunas attempadas. La Casa Son Martin è ina impurtanta instituziun cun 75 emploiadas ed emploiads. La partiziun gronda è quella da la tgira, ella è l'essenziala ed il cor da l'instituziun. Qua pon las abitantas ed ils abitants giudair tgira ed assistenza qualifitgada en in ambient duaivel e ruassaivel.
La Casa Son Martin è in manaschi pitschen e famigliar. Sco quai che Anna Jäger remartga ha ella manà a Kreuzlingen en il chantun Turgovia ina chasa cun 255 letgs e passa 350 emploiads – ina instituziun bler pli gronda che quella da Trun.
Garanzia per scolaziuns
La manadra tira, mo curtamain, il connex cun la situaziun dad avant dus onns a Trun. Lura è la Casa Son Martin vegnida en las medias pervia da svaris interns e demissiuns. Anna Jäger, economa da manaschi oriunda da Faveras, è vegnida en Surselva en l'atun 2024 per surpigliar il post da maina chasa. Glindesdi, a chaschun da la viseta da la FMR, ha ella punctuà: «Quai ch'è stà è stà. Nus na vulain betg mirar enavos, mabain enavant. Jau pos dir che nus faschain quai cun schlantsch, cumpetenza e gronda motivaziun». La Casa Son Martin po puspè scolar persunal, «quai è ina novitad legraivla che nus vulain e dastgain communitgar», ha Anna Jäger ditg.
Spezialistas da tgira e gidantras da tgira ha la Casa Son Martin bain adina scolà? Ed era persunal en ils auters secturs d'ina casa da tgira? «Il sectur da la scolaziun era sa durmentà in pau ils davos onns», remartga la maina chasa. La novitad principala actuala saja effectivamain che l'instituziun a Trun saja puspè in manaschi che porscha scolaziuns ed emprendissadis, conferma Anna Jäger. Ins haja pudì recrutar persunal qualifitgà ed occupar divers posts danovamain, di ella. Tranter auter è Angelica Arpagaus nova manadra da la partiziun tgira. Ella è returnada en ses vitg nativ e dapi l'atun passà maina ella quella partiziun da la Casa Son Martin. Cun sia squadra assista ella a las persunas confidadas.
Professiuns pretensiusas
Tgirar persunas attempadas è ina lavur che pretenda empatia, respect e finezza. «Il persunal vegn scolà regularmain en las spartas da tschep», explitgescha Angelica Arpagaus ed agiunta: «Nossa finamira e noss pensum è da dar a las persunas confidadas qualitad da viver.» Dapi l'entschatta da l'onn 2026 è Claudia Venzin responsabla per il svilup da la tgira.
Cun sia savida organisescha ella curs da perfecziunament, cusseglia il persunal ch'è en contact cun las persunas dependentas da tgira. La Casa Son Martin ha pudì recrutar plinavant ina persuna ch'è responsabla per la furmaziun professiunala d'emprendists e studentas. Ensemen cun duas assistentas ord il manaschi organisescha quella persuna il program da scolaziun.
Sfidas dal proxim futur
A Trun han persunas interessadas la pussaivladad d'absolver emprendissadis sco spezialistas e spezialists da sanadad ed assistentas ed assistents da sanadad e socialesser sco era studis per il diplom da spezialista u spezialist da tgira. Igl èn professiuns pretensiusas. «Nus promovain e scolain activamain glieud per quellas clamadas – ed investin uschia en il provediment sanitar da damaun», è Anna Jäger persvadida.
La maina chasa punctuescha anc ina giada che la Casa Son Martin è semtgada per las sfidas dal futur. Che la recrutaziun da persunal è ina tala, è ella persvasa. Ina proxima sfida na pertutga betg la partiziun da tgira, mabain ina restructuraziun dal sistem sanitar regiunal. Igl è planisà d'incorporar il manaschi da la Casa Son Martin en la societad Rait da sanadad Surselva. A partir dal 1. da schaner 2027 cumpiglia quella il Spital regiunal Surselva e differentas chasas da tgira e duas organisaziuns da Spitex.