Trun: La chasa Desax vegn vendida

2015 ha Susanne Hollenstein da Malans cumprà la chasa Desax. Uss vul ella vender ella – inclusiv ils plans da l’architect – per 640’000 francs.

La chasa Desax a Trun Bild in Lightbox öffnen.

Legenda da maletgs: La chasa Desax amez Trun. RTR, Hubert Giger

La finamira era stada da renovar questa chasa patriziana ch'è vegnida construida en stil franzos. Susanne Hollenstein vuleva investir 1.5 fin 2 milliuns francs. Per tegnair ils custs da la renovaziun en in tschert rom hajan els vulì rimnar daners da fundaziuns. Mo quellas n'hajan betg sustegnì il project.

Betg pudì vender

Alura sajan els sa decidids da vender ina fin duas abitaziuns. Mo quai na saja reussì. Il motiv: I fiss stà cumplitgà da parter la chasa en pliras parts ed els n'hajan chattà nagins interessents. Hollenstein suppona ch’in interessent veglia savair, co in'abitaziun sa preschentia cura ch’ella saja renovada. Quai saja sco ina serp che morda a sa sezza en la cua: Els na possian betg vender insatge che na saja betg fatg, ed els n'hajan betg pudì renovar sco els vulevan perquai ch’ils daners hajan mancà.

L'istorgia

La chasa Desax è vegnida construida 1782. Ludwig Hercules Caspar Deodatus de Caprez (1736 – 1799) era uffizier en servetsch franzos ed ha laschà construir ella sper la chasa Tödi, la chasa da ses geniturs. Cura ch’el è mort è il bajetg vegnì en ils mauns da sia figlia giuvna Maria Ludovica de Caprez. Il proxim che ha survegnì quest bajetg è stà in figl da Maria Ludovica, Bruno Lombris (1830 – 1908). Sia figlia, Sabina Lombris (1866 – 1940) ha maridà Sepp Fidel Desax (1848 – 1913). Quel possedeva in hotel a Madrid ed è turnà a Trun, perquai che sia dunna na sa sentiva betg bain en il clima da la Spagna. Alura ha Sepp Fidel acquistà il bajetg da ses sir. El ha laschà construir grondas pignas scalegl ed ha renovà la chasa il 1904.

Da Augustin Desax tar Tarcisi Maissen SA e Susanne Hollenstein

L’ultima persuna da schlattaina nobla che ha vivì en la chasa Desax era Augustin Desax (1896 – 1993), in figl da Sepp Fidel e Sabina. El viveva en la segunda auzada ensemen cun sia nezza e chasarina Mathilda Pajarola. 1998 ha la cuminanza d’ierta Desax vendì la chasa a l’interpresa Tarcisi Maissen SA, e quella ha vendì ella 2015 a Susanne Hollenstein.

RR actualitad 07:00