L’attatga musicala baud la damaun sin las vias da Sedrun è fitg impurtanta per ils Vagabunds. Punct las sis han las 25 commembras e commembers che han gì temp oz, sunà ils emprims tuns atras las trumbettas, posaunas, sousafons e sin l'entira percussiun.
La musica da tschaiver, tenor agens pleds «legendara», han dus amaturs dal tschaiver fundà il 1986. Ella cumpiglia actualmain 39 commembras e commembers.
Finalmain puspè tschaiver!
Las 25 commembras e commembers che sunan durant il til matutin da la gievgia grassa a Sedrun sa legran fitg da puspè pudair far tschaiver. La motivaziun è gronda, quai di era la presidenta, Anita Duff:
In grond program
Suenter quatter u tschintg tocs, fan ils Vagabunds l'emprim stop. En ina garascha datti l'emprim caffe cun vinars. Suenter la punt en direcziun Dieni, fan ils Vagabunds in caraun enavos en il vitg, direcziun staziun dal tren.
Là ensolvan ils Vagabunds ensemen, avant ch'els sunan lura per las scolaras ed ils scolars durant la pausa gronda. Entant ch'ils uffants van enavos a scola, sa smincan ils Vagabunds da Sedrun per il til ch'entschaiva las 13:30.
Suenter il til e concert sin il plaz, prendan els ensemen cun trais autras guggas da la Cadi, la pendiculara si en il territori da skis. La saira è lura anc la festa gronda a Sedrun sez en in club.
In til per tut pretsch
Sedrun fa sco sulet lieu in til durant ses tschaiver. Che quai è pussaivel, è d'engraziar a l'iniziant, Daniel Schmid, ch'è s'engaschà fitg da far in til. Uschia ha el decis avant Nadal, da far in til per tut pretsch. Sche betg en furma d'in til atras il vitg, lura almain en la scola cun ils uffants, di Daniel Schmid. Ses engaschi n'è betg adina fruntà sin chapientscha, sco el di en l'intervista:
