Siglir tar il cuntegn

Header

Navigaziun

cuntegn

Surselva Tschaiver a Trun: Fusiun e celibat

25 gruppas han fatg part al til da tschaiver a Trun. La gronda part eran gruppas da Sedrun fin Glion. Ma era duas gruppas da la Bassa, da Weinfelden e da Thal SG, èn stadas da la partida.

Abracadabra – tge datti cun la fusiun da Trun e Sumvitg? Quai han las strias al til vulì savair. Represchentants da la baselgia catolica han pretendì da schliar il celibat e da laschar maridar, la finala sajan els era umans. In auter tema è stà la stad passada cun la chalira: la chalira da crappar ha fatg che las vespras han stuì emigrar. Ils uffants da las emprimas duas classas da la scola da Sumvitg- Trun èn sa fatschentads cun il plan d’instrucziun 21.

9 musicas han accumpagnà il til, che ha cumenzà ad ir tras il vitg da Trun a las 13:30. Suenter han las guggas dà plirs concerts, tranter auter avant il center da cultura ed avant l’ustaria Ischi.

Organisà il til da tschaiver han las Lieurs da Trun, la musica indigena da tschaiver fa quai dapi quasi 20 onns.

Ustarias plainas

Sonda da mezdi, ils 23 da favrer, eran il Cafe Tschut e l’ustaria Ischi plains. Sco Cristina Derungs, che serviva en il Cafe Tschut ha ditg ad RTR, hajan differentas gruppas reservà per gentar e la saira vegnian las musicas da tschaiver. En sala hajan els 90 plazs ed en l’ustaria circa 40, mo il di da tschaiver fetschian els plaz per 60 persunas. La finala saja quai il di impurtant da l’onn.

Da mezdi era er l’Ischi plain. La giuventetgna haja empustà gentar, e cun 45 plazs saja l’ustaria spert plaina, ha il possessur Otti Steiner ditg. Era el di ch’il tschaiver saja in dals megliers dis da l’onn.

In pau pli ruassaivel eri da mezdi anc en la Casa Tödi ed en la Pizzeria Trattoria Centro. Manuel Reichenbach, il possessur da la Casa Tödi, di ch’el haja fitg bun cun il tschaiver. La saira fetschian els la tschaina tradiziunala, l'onn passà hajan els preparà ca. 100 tschainas. Dapi onns vegnian las Fifferlottas da Segnas tar els. Nicola Allegrotti che lavura en la Pizzeria Trattoria Centro manegia, ch’i dettia ina gronda festa sco els hajan adina fatg.

RR actualitad 08:00