La via dal pass dal Lucmagn po vegnir schlargiada e sanada. La regenza grischuna ha dà glisch verda al project da total 5,1 milliuns francs. Quel prevesa tranter auter da schlargiar in toc da la via curt davant il cunfin cun il Tessin. Quest traject na correspundia betg pli als standards da segirezza e duai perquai vegnir schlargià sin 6 meters. Plinavant duai la punt da Stgegia vegnir sanada.
Pervi da la topografia, cun ina paraid da crap sin ina vart e pilasters da sustegn da tschella vart, vegn la via schlargiada sin la vart da la val. Quai munta che la construcziun da sustegn sto vegnir fatga nova.
La via dal Lucmagn va da Mustér tras la Val Medel fin tar il cunfin cun il Tessin e vala sco impurtanta colliaziun tranter il Grischun ed il vischin dal sid.
