Il titel ha Isidor Winzap da Falera tschernì sapientivamain, sco el di. Donat Cadruvi haja scrit istorgias sin fundament da sentupadas ubain dad enconuschientschas ch’el haja fatg – e tranteren dettia el ses sal e paiver, dentant en moda rienta.
Winzap ha lectorà e redigì il manuscrit da var 250 paginas, scrittas cun ina maschina Hermes da 1937, sco el raquinta. Quai na possian ins betg surdar en questa moda a la stampa. Perquai haja el stuì scriver tut en furma digitala.
Relasch da var 2'100 paginas
Donat Cadruvi ha scrit bler, surtut suenter ch’el era sa retratg sco cusseglier guvernativ dal Grischun ( 1979 – 1988). El è mort 1998. Ses relasch litterar è tar l’archiv cultural da la Foppa a Rueun.
Il relasch consista da var 2'100 paginas en sis stgatlas. Per quel hajan els fatg ina stivetta Cadruvi, sco l’archivari e plevon Jan-Andrea Bernhard declera. Ina part da quest relasch n'è anc betg publitgada.
Raquints en plirs Tschespets
Intgins raquints dal scriptur, che era burgais da Ruschein e steva a Glion, èn gia vegnids publitgads en Tschespets: Sin ballontscha (Tschespet 50, 1977), Cumiaus (Tschespet 60, 1989) e Sabina ed autras raquintaziuns (Tschespet 63, 1992).
RR actualitad 06:15