Siglir tar il cuntegn
Inhalt

Surselva Tujetsch: Co discurran uffants il dialect tuatschin?

Ils scienziads da l’universitad da Turitg perscruteschan linguatgs pitschens e periclitads sin l’entir mund. Uss intercureschan els il dialect che vegn discurrì en Val Tujetsch.

Il team da l'universitad da Turitg: Sabine Stoll, Jekaterina Mazara, Géraldine Walther, Michele Loporcaro (da sen)
Legenda: Il team da l'universitad da Turitg (da san.): Sabine Stoll, Jekaterina Mazara, Géraldine Walther e Michele Loporcaro. RTR, Hubert Giger

Sis famiglias stattan a disposiziun durant in onn per registrar cura ch’ils uffants discurran en chasa ubain ordavert.

500 uras dialect tuatschin

Ils scienziads vulan registrar circa 500 uras da pled discurrì – mintga mais da quai da tschintg uras per uffant. Els vulan observar, tge svilup ch’in uffant fa cun la lingua. Tar ils creschids èsi circa 100 uras.

Sco Sabine Stoll, professura da psicolinguistica a l’universitad da Turitg, ha ditg a RTR, na saja quai stà simpel da chattar famiglias, nua che uffants discurran anc tuatschin a chasa. Perquai vegnian els gist anc il dretg mument per documentar il svilup dal dialect tuatschin.

Co emprendan uffants il dialect

Documentar ed analisar la lingua è ina finamira. In’autra è da eruir, co ch'ils uffants emprendan quest linguatg e co ch'els vegnan a frida cun la plurilinguitad, vul dir, tge schabegia sch’els discurran a chasa dialect tudestg?

A la dumonda pertge ch’els perscruteschan uss il dialect tuatschin di Sabine Stoll, che quai saja impurtant dad er perscrutar ils linguatgs pigns en l’atgna terra – pia avant l’atgna porta. A la fin dal project veglian els era dar insatge als indigens. L’idea è da far ina grammatica, in vocabulari ubain material per las scolas en dialect tuatschin.