La suprastanza communala da Tujetsch ha laschà examinar pliras propostas per megliurar l’access a la staziun e sur la staziun da Sedrun, uschia scriva la suprastanza en il messadi. Tranter auter èn variantas cun stgalas rullantas a la staziun vegnidas examinadas ed alura era puspè sbattidas, suenter ch’ils custs eran sin maisa. Era l’access al territori da skis è vegni discutà cun sur e sutpassadis, ma la finala è ina rampa vegnida favurisada. Quella custa a la vischnanca circa 450’000 francs e cunquai ch’ella è suttetg custa il mantegniment radund 1’000 francs ad onn, scriva la suprastanza. Las pendicularas da Mustér vulan sa participar cun 200’000 francs vida ils custs da questa rampa. Era duai dar in perrun per il tren da sport sut in tetg. Lezza construcziun na custa a la vischnanca nagut.
Tualetta publica per persunas cun impediment
La raschun daco che la viafier Matterhorn-Gottard (MGB) ha da sanar la staziun a Sedrun è la lescha per persunas cun in impediment che ha da vegnir applitgada. Cun quai che l’ustaria na porscha nagina tualetta per persunas cun impediments e per las persunas che van sin il tren, vul la vischnanca construir ina tala. La MGB n’è betg responsabla da far quai, scriva la suprastanza. Ils custs totals muntan a 70’000 francs ed ils custs annuals a 10’000 francs. Vegnir duai tut gist dasper la stgala che maina en il sutpassadi. Ils ulteriurs daners vegnan impundids per la sanaziun da plirs sutpassadis e da la passarella sur la punt dal Drun. Cumenzar duajan las lavurs il settember 2024 ed esser finidas il november 2025.