Tujetsch: Discussiuns davart la pendiculara Sedrun – Cuolm da Vi

Dumengia sto Tujetsch decider ina emprima giada sur dal project da la pendiculara planisada da Sedrun sin il Cuolm da Vi. En votaziun stat il plan da zonas ed il plan general d’avertura che duain vegnir adattads per pudair colliar ils territoris da skis da Sedrun e Mustér.

La staziun ed il restaurant planisads sin il Cuolm da Vi. Bild in Lightbox öffnen.

Legenda da maletgs: La staziun ed il restaurant planisads sin il Cuolm da Vi. MAD

En connex cun questa votaziun hai dà discussiuns surtut en la gasetta locala «La Tuatschina». Las posiziuns èn però surtut positivas envers il project da la pendiculara Sedrun – Cuolm da Vi.

In pass en la dretga direcziun

Arthur Loretz da la Pro Cungieri citescha Samih Sawiris. Lez haja ditg che mo communablamain sajan els ferms envers las destinaziuns grondas ed etablidas.
Era l’organisaziun Sedrun Mustér Turissem e la Viafier Matterhorn-Gottard beneventan il project.

L’Uniun da giuventetgna da Tujetsch scriva che questa colliaziun saja in pass en la dretga direcziun. Ella augmentia la purschida per giasts ed indigens, e quai stad ed enviern. Il deputà en il cussegl grond René Epp discurra dad in term impurtant e dad in progress per la destinaziun da vacanzas Sedrun – Mustér – Andermatt.

«In miserabel project»

Ma i dat era intginas paucas vuschs criticas e quellas vegnan da dus anteriurs chanzlists da Tujetsch. Tumaisch Valier ha gì scrit en la Tuatschina dals 28 d’avrigl che la pendiculara Sedrun – Cuolm da Vi saja in «miserabel project», che la vischnanca na possia finanzialmain betg sa lubir da far part dad in project che portia nagin niz e l’adattaziun dal plan da zonas cuntrafetschia a la lescha da bajegiar.

Edgar Hitz propona en la Quotidiana dals 17 da matg da dir «ad interim NA». Il project na saja anc betg madir ed ultra da quai duess ins preschentar in plan da finanzas da la vischnanca per mussar sch’i fiss pussaivel da finanziar il project.

Autoritads communalas dian gea

Las emprimas discussiuns publicas èn stadas ils 12 d’avrigl en il cussegl da vischnanca. Tant il cussegl sco la suprastanza ed il president communal Beat Roeschlin proponan unanimamain da dir gea dumengia che vegn.

RR actualitad 07:00