Cun la nova lescha da parcar proponida da la suprastanza fissi be pli stà pussaivel da deponer il vehichel tranter las 06:00 e las 20:00 sin l’intschess communal ordvart la zona dal vitg. Il cussegl da vischnanca è dentant da l’opiniun che quella lescha na duaja betg esser uschè restrictiva.
Era la dumonda per ina contribuziun da 100'000 francs per la Andermatt-Sedrun Sport SA duaja vegnir tractada danovamain da la suprastanza. Il cussegl da vischnanca di ch’i manchia arguments impurtants en la documentaziun fatga da las pendicularas.
Tar omaduas fatschentas resta la pussaivladad da suttametter ellas a la radunanza communala.
Vinavant ha la vischnanca decis sur dal reglament per far diever da vias d'uaul e da funs cun vehichels da motor. Igl è vegnì decis d'approbar la revisiun e da midar il reglement en ina lescha.
Sco quarta fatschenta ha il cussegl da vischnanca tractà la revisiun da la lescha e dal regulativ davart l'economisaziun dals ruments. Ella è vegnida approvada dal cussegl unaniamain. Era quella fatschenta vegn anc suttamess a la radunanza da vischnanca.