Cun agid da dus chanuns da naiv è vegnida preparada ina loipa da radund 3 kilometers. Era sche quai è dapertut quasi verd en il conturn, giu dasper il Rain è la naiv artifiziala sa mantegnida bain, uschè bain ch’ins po far passlung.
Maraton da la Surselva periclità senza sustegn da surengiu
Quai è impurtant, tant per ils giasts da vacanzas, sco era per ils indigens. Els èn cuntents da pudair insumma porscher la loipa per il sport nordic, di il responsabel da la vischnanca Daniel Schmid. La vischnanca da Tujetsch è responsabla per la preparaziun da la loipa.
Sche las temperaturas vegnian puspè pli bassas, alura vegnian els era far anc supplementar naiv, era en vista al maraton da la Surselva la fin schaner. Sch'i na naiva insumma nagut, fiss quel dentant periclità. Gliez fiss donn, Il comité d’organisaziun dal maraton haja fatg sur tut quels onns ina fitg buna lavur ed etablì quella cursa da passlung en Surselva, di Daniel Schmid.
Far biatlon en Tujetsch, fiss gia uss pussaivel
La vischnanca da Tujetsch ha gidà al club da skis da cumprar duas schibas per far biatlon. Il club da skis è vegnì vers la vischnanca e giavischà in sustegn e quel hajan ins dà fitg gugent, di Daniel Schmid. L’infrastructura, pia las duas schibas, restian dentant en possess dal club da skis, ch’ha uschia era da mirar per il mantegniment.
Surtut per la giuventetgna e per l’IO è la purschida ponderada. Ina da las trenadras è stada a far curs per sa perfecziunar ed uschia saja quai pussaivel da porscher a la giuventetgna ina cumbinaziun dal sport da tir cun quel da passlung. Pertge omadus sports vegnian gia oz pratitgads cun success en Tujetsch e perquai saja la cumbinaziun ideala, di Daniel Schmid.
Sch’ins guarda en direcziun da Lai cun sia purschida da biatlon alura sajan ins sin la dretga via, mintgatant stoppian ins simplamain era empruvar insatge nov e lura vesian ins co quai sa sviluppeschia. En il cas ideal possian alura era mintgin far diever da la purschida, di Daniel Schmid.
