Siglir tar il cuntegn

Header

cuntegn

Tujetsch In mez milliun francs per archiv cultural

Il parlament da la vischnanca da Tujetsch ha concedì ina contribuziun unica d’in mez milliun francs per la construcziun d’in nov archiv cultural. Realisar il project che custa total 1,6 milliuns francs vegn l'uniun Forum Cultural Tujetsch.

L’uniun Forum Cultural Tujetsch survegn in mez milliun francs sco sustegn dal maun public. Suenter la donaziun da Norbert Berther d’in mez milliun francs per la realisaziun d’in forum cultural era l’idea, ch’è gia pli che 20 onns veglia, vegnida pli concreta, uschia Tarcisi Hendry, actuar da l’uniun ed archivar communal. Uss ,cun la conferma dals daners da la vischnanca, possian ins propi ir vida rimnar ils ulteriurs 600’000 francs che mancan anc. Cun la situaziun actuala da mancanza da material da construcziun hajan els anc fatg ulteriuras calculaziuns necessarias. Ma els sajan da buna speranza da pudair recaltgar ils ulteriurs daners e da cumenzar cun las lavurs la primavaira 2023, uschia Tarcisi Hendry.

Planisà è in bajetg da lain

Il plan da construir in nov archiv cultural saja in project unic en l’entir chantun, normalmain sajan tals archivs en bajetgs vegls e cun il bajetg planisà da Gion A. Caminada possian ins realisar in project unic, uschia Tarcisi Hendry. Il bajetg dal tut ord da lain duai vegnir realisà sin la parcella dasper il Museum La Truaisch Sedrun ed uschia cumplettar la purschida ed era porscher plaz per entupadas ed occurrenzas.

Quint communal 2021 cun gudogn

Vinavant ha il parlament da Tujetsch approvà il quint dal 2021 che serra cun in gudogn da radund 500’000 francs, quai tar entradas da radund 16,1 milliuns francs. Era ha il cussegl approvà da remetter ina summa da 700’000 francs per la renovaziun ed engrondiment planisà dal Bogn Sedrun.

audio
Per tadlar: curt e cumpact
ord RTR Audio dals 12.05.2022.
laschar ir. Durada: 1 minuta 4 Secundas.

RTR novitads 12:00

Artitgels legids il pli savens