Siglir tar il cuntegn

Header

audio
La grammatica per il dialect tuatschin – en englais
Or da Actualitad dals 14.08.2021.
laschar ir. Durada: 02:59 minutas.
cuntegn

Tujetsch Ina grammatica per il dialect tuatschin

2016 ha il linguist Philippe Maurer cumenzà a lavurar vid ina grammatica tuatschina. Quella è fatga, dentant anc betg stampada. Ussa vul el era scriver ina versiun rumantscha.

Scriver SMS sco quai ch'ins vul

Co scriv'ins «betg» u «cuntiants»? Il linguist scriva «bétg» per inditgar ch'igl è da leger cun in «e» serrà e betg avert. E «cuntjants» cun «j» per inditgar ch’ins stoppia accentuar igl «a». Mo quai saja reglas e normas per ils linguists e spezialists dal linguatg; e perquai ha el scrit la grammatica en englais. En il linguatg pledà dal mintgadi (per exempel SMS) possia mintgina e mintgin scriver sco quai ch’el veglia. Impurtant saja che la communicaziun funcziuneschia.

I dat mo paucs texts en dialect tuatschin

Philippe Maurer ha lavurà cun persunas da 30 – 80 onns. Tuts sajan stads d’accord da discurrer rumantsch cun el che ha emprendì rumantsch ed abita a Wetzikon (Turitg). Difficil saja stà da scriver la grammatica, perquai ch’i dettia mo paucs texts en scrit. E fitg pauc dettia quai da la versiun da Selva e Tschamutt, perquai che fitg paucs discurrian anc quella versiun. In bun agid per sia lavur saja stada la grammatica sursilvana dad Arnold Spescha.

Era ina versiun rumantscha

Anc quest onn vul il linguist e romanist cumenzar a scriver ina versiun rumantscha da 100-120 paginas. Ina dumonda saja alura, per tgi ch’ins veglia crear quella: per ils indigens ubain era per ils giasts da vacanzas. Per quels stoppian ins alura porscher dapli infurmaziuns. Ma en scadin cas veglia el scriver ina grammatica cun ina ortografia simpla.

RTR actualitad 07:00

Artitgels legids il pli savens

Scrollar a sanestra Scrollar a dretga