Las elecziuns communalas dals 7 da matg a Tujetsch èn stadas extraordinarias. Suenter ch'il pievel ha acceptà la nova constituziun communala n'ha la vischnanca betg pli d'eleger il cussegl da vischnanca. Ina reducziun dal dumber da commembras e commembers datti tar il cussegl da scola. La constituziun communala revedida va en vigur il prim da fanadur 2023. Lura cumenza er la nova perioda d'uffizi da las instanzas politicas.
Segund scrutini per cumissiun da gestiun
Da la cumissiun da gestiun eran Primus Deragisch, Baseli Huonder e Severino Solèr sa retratgs. Cun quai ch'i n'è betg reussì da chattar candidatas u candidats per quest organ sin il termin d'annunzia èn vegnids elegids: Guido Friberg (44 vuschs), Arno Berther (31 vuschs), Primus Deragisch (30 vuschs). Tuts trais n'avevan betg candidà.
Sco la vischnanca scriva ils 16 da matg han tut ils trais elegids refusà l'elecziun. Cun quai datti in segund scrutini ils 9 da fanadur. Il biro electoral supplitgescha ussa ils e las da Tujetsch da nominar candidats e candidatas per ils trais posts vids. Glistas cun candidaturas pon vegnir inoltradas enfin ils 19 da zercladur.
Medem president e be in midament en la suprastanza
Martin Cavegn è vegnì reelegì sco president communal cun 292 vuschs (maioritad absoluta 164). Reelegids en la suprastanza èn vegnids Nicole Giossi (337 vuschs), Guido Monn (213 vuschs) e Daniel Schmid (260 vuschs). Per Renato Decurtins, ch'è sa retratg sin la fin da zercladur, vegn nov en la suprastanza Désirée Willimann (257 vuschs). Tuts quatter han cuntanschì la maioritad absoluta.
Cussegl da scola redimensiunà
Sin basa da la constituziun nova è il cussegl da scola vegnì reducì sin trais persunas. Ina da quellas è il represchentant da la suprastanza communala che dirigia il departament da scola. Uschia eran d'occupar anc dus posts. Tania Loretz (326 vuschs) e Ronny Levy (289 vuschs) èn vegnids elegids, omadus appartegnan gia ussa al cussegl da scola.
Or da l'archiv
Il 2020 ha Martin Cavegn cumenzà ses uffizi sco president da la vischnanca da Tujetsch.
