Entant che Sedrun Mustér Turissem ha survegnì quest onn 840’000 francs da la vischnanca da Tujetsch è previs en il preventiv 2016 be 440’000 francs. Per Sedrun Mustér Turissem (SMT) è quai ina surpraisa. Sco il directur Hans-Kaspar Schwarzenbach ha ditg a Radiotelevisiun Svizra Rumantscha na sappian ins anc betg nua spargnar quests daners e n’era betg sche l’organisaziun da turissem possia insumma anc ademplir ses pensum. Perquai haja la suprastanza da SMT contactà il cussegl da vischnanca e declerà la situaziun.
La vischnanca n’ha betg da far turissem
La sparta turissem dal preventiv haja gia dà discussiun avant tar ils cussegliers, ha ditg il president dal cussegl da vischnanca René Epp. Empè da dar dapli daners a l’organisaziun da turissem prevedia il preventiv che la vischnanca paja sezza per purschidas ch’èn stadas includidas en la charta da giasts la stad passada. Uschia èn per exempel prevesidas contribuziuns a la Viafier Matterhorn-Gottard ubain per la pendiculara dal Tgom u quella da Mustér. Tenor René Epp è quai la fallada via. «Quai n’è betg chaussa da la vischnanca. La vischnanca ha tenor lescha da far l’incasso da las taxas e surdar ils daners a l’organisaziun turistica e lezza fa las cunvegnas cun ils differents partenaris e decida era las summas» declera René Epp.
Il cussegl da vischnanca tracta mesemna, ils 4-11-2015 il preventiv e vegn a decider sch’el accepta quel u pretenda midadas. René Epp quinta ch’ì vegnia a dar ina pulita discussiun davart la sparta turissem dal preventiv 2016.