Siglir tar il cuntegn

Header

Logo Sedrun Mustér Turissem
Legenda: Tenor preventiv duai Sedrun Mustér Turissem survegnir 400'000 francs damain da Tujetsch. RTR, G. Hosang
cuntegn

Surselva Tujetsch: Reducir la contribuziun a Sedrun Mustér Turissem?

Il preventiv 2016 da la vischnanca da Tujetsch prevesa 400’000 francs damain per Sedrun Mustér Turissem. Quai procura per discussiuns en il cussegl da vischnanca e tar l’organisaziun da turissem.

Entant che Sedrun Mustér Turissem ha survegnì quest onn 840’000 francs da la vischnanca da Tujetsch è previs en il preventiv 2016 be 440’000 francs. Per Sedrun Mustér Turissem (SMT) è quai ina surpraisa. Sco il directur Hans-Kaspar Schwarzenbach ha ditg a Radiotelevisiun Svizra Rumantscha na sappian ins anc betg nua spargnar quests daners e n’era betg sche l’organisaziun da turissem possia insumma anc ademplir ses pensum. Perquai haja la suprastanza da SMT contactà il cussegl da vischnanca e declerà la situaziun.

audio
Mezdi: Preventiv da Tujetsch prevesa la mesadad per SMT
ord Actualitad dals 04.11.2015.
laschar ir. Durada: 2 minutas 38 Secundas.
La vischnanca n’ha betg da far turissem
Autur: René Epppresident dal cussegl da vischnanca da Tujetsch

La sparta turissem dal preventiv haja gia dà discussiun avant tar ils cussegliers, ha ditg il president dal cussegl da vischnanca René Epp. Empè da dar dapli daners a l’organisaziun da turissem prevedia il preventiv che la vischnanca paja sezza per purschidas ch’èn stadas includidas en la charta da giasts la stad passada. Uschia èn per exempel prevesidas contribuziuns a la Viafier Matterhorn-Gottard ubain per la pendiculara dal Tgom u quella da Mustér. Tenor René Epp è quai la fallada via. «Quai n’è betg chaussa da la vischnanca. La vischnanca ha tenor lescha da far l’incasso da las taxas e surdar ils daners a l’organisaziun turistica e lezza fa las cunvegnas cun ils differents partenaris e decida era las summas» declera René Epp.

Il cussegl da vischnanca tracta mesemna, ils 4-11-2015 il preventiv e vegn a decider sch’el accepta quel u pretenda midadas. René Epp quinta ch’ì vegnia a dar ina pulita discussiun davart la sparta turissem dal preventiv 2016.

Artitgels legids il pli savens