Il president da Sedrun Mustér Turissem (SMT), Curdin Brugger è levgià che la vischnanca da Tujetsch visescha la cunvegna pir sin la fin da l’onn da fatschenta. Quai saia il sulet termin realistic. Sco il president da la vischnanca da Tujetsch, Beat Roeschlin ha ditg a Radiotelevisiun Svizra Rumantscha, haja SMT declerà che quai dessi in problem finanzial per l’organisaziun da turissem sche Tujetsch visas la cunvegnia gia sin la fin d’october. Ils daners che las vischnancas pajan saja gia liads cun prestaziuns las qualas ins possia visar pir cun la fin da l’onn da fatschenta, ha ditg Beat Roeschlin. Uschia saja quai era stà cler che la vischnanca stoppia collavurar fin la fin da l’onn da fatschenta.
Mustér è trumpà – collavuraziun n’è betg periclitada
Entras questa acziun haja la collavuraziun sco tala tranter Mustér e Sedrun patì in zichel, di il president da vischnanca da Mustér, Francestg Cajacob. Malgrà quest fatg èsi cler per Francestg Cajacob che Mustér sto e vul era collavurar sin il sectur da turissem cun la vischnanca da Tujetsch. Era Beat Roeschlin punctuescha che Tujetsch veglia collavurar vinavant cun Mustér.
Omaduas suprastanzas communalas han ussa da far ponderaziuns tge finamiras ch’ellas han e cun tge structuras ch’ellas vulan s’organisar en il sectur dal turissem.