Il president communal da Tujetsch Beat Roeschlin ha sperà ch’i dettia ina gea unanim. El craja che votantas e votants guardian tge ch’il cussegl di. El è perschuadì dal project; ed era plirs cussegliers han manegià che quest project haja in grond potenzial turistic.
Engrondir zona da sport si Cuolm da Vi
Il plan da zonas 1:5’000 cuntegn ina pitschna adattaziun da la zona da sport en il territori da Cungieri. Quella è necessaria per che l’extrada a Cungieri saja gist sper la zona da sport. Plinavant ston ins engrondir la zona da sport a Cuolm da Vi, nua ch’il runal vegn construì.
E la finala datti midadas vid la zona per la protecziun dal guaud e da la selvaschina.
Uffizi federal per traffic decida sur da la pendiculara
En il plan d’avertura vegn differenzià tranter ils cundrezs che l’uffizi federal per traffic lubescha e quels che dovran ina lubientscha da la vischnanca e da l’uffizi chantunal per il svilup dal territori. Tujetsch sto lubir las colliaziuns fin a la staziun a val a Salins e fin a la staziun a Cungieri cun lingias d’aua, d’electricitad e da chanalisaziun. Ultra da quai sto la vischnanca lubir da dischlocar la via forestala ed agricula tar la staziun a Salins ed era lubir il runal si Cuolm da Vi.
L’uffizi federal per traffic sto lubir la pendiculara da Sedrun/Salins - Cungieri - Cuolm da Vi e la staziun da trafo sper la staziun si Cuolm da Vi.
Votaziun a l'urna ils 21 da matg
Uss vegn questa fatschenta anc suttamessa a la votaziun a l’urna ils 21 da matg en Tujetsch. I n`è dentant betg anc cler, cura che l’emprest dad 2.5 milliuns francs per questa pendiculara vegn tractà en il cussegl da vischnanca da Tujetsch.
RR novitads 06:00