Siglir tar il cuntegn

Header

video
Tarcisi Hendry survegn il premi SRG.R per ses engaschi tranter auter per il museum «La Truaisch»
Or da Telesguard dals 29.09.2020.
laschar ir
cuntegn

Tujetsch Tarcisi Hendry survegn il premi SRG.R

La suprastanza da la SRG SSR Svizra Rumantscha (SRG.R) ha decidì d’undrar Tarcisi Hendry cun il premi SRG.R 2020. Tarcisi Hendry è scolast pensiunà e dapi passa 40 onns archivar da Tujetsch.

L’istorgia ha gia adina interessà l’um da 68 onns. Gia sco giuvenot da 27 onns ha el cumenzà a rimnar da tutta sorts documents per l’archiv, e quai – nota bene – dasper sia professiun sco scolast primar. El è s’engaschà per il linguatg e la cultura tuatschina sco paucs auters.

El ha merità quest premi, quel duess esser renconuschientscha per la lavur prestada e dar anim da cuntinuar.
Autur: Vincent AugustinPresident da la SRG.R
Il president da vischnanca da Tujetsch, Martin Cavegn; il retschavider dal premi, Tarcisi Hendry ed il president da la SRG.R, Vincent Augustin
Legenda: Il president da vischnanca da Tujetsch, Martin Cavegn; il retschavider dal premi, Tarcisi Hendry ed il president da la SRG.R, Vincent Augustin RTR, Linus Livers
Jau sun engraziaivel per questa renconuschientscha, ina nunditga surpraisa.
Autur: Tarcisi HendryPromotur da la cultura tuatschina

L'engaschi cultural da Tarcisi Hendry

Tarcisi Hendry ha dirigì divers chors, ha timunà diversas uniuns sco l’uniun da giuventetgna, l’uniun da pestgaders, la plaiv da Tujetsch u la cumissiun da restauraziun da la baselgia parochiala Sedrun. El è stà iniziant e confundatur dal Forum cultural Tujetsch e president da la cumissiun Museum La Truaisch.

La cultura è mia vita, jau dovr quai per viver ed era per mia cuntentientscha.
Autur: Tarcisi Hendry

Sco commember da la cumissiun da studi per l’erecziun d’in Archiv cultural Tujetsch è el er s’engaschà per l’engrondiment dal Museum La Truaisch. Dapi blers onns è Tarcisi Hendry ultra da quai inspectur chantunal d’archivs per la Surselva. Ils ultims onns ha el er fatg part a la cumissiun Museums Grischun per preparar directivas per ils museums culturals.

El fa, ha fatg ed jau sper ch’el vegnia era a far nunditga lavur per nossa vischnanca.
Autur: Martin CavegnPresident da vischnanca da Tujetsch

Premi SRG.R

Textbox aufklappenTextbox zuklappen

La SRG.R surdat mintg’onn in premi a persunas u instituziuns che s’engaschan a moda extraordinaria per linguatg e cultura rumantscha.

Il premi ch’è dotà cun 8’000 francs vegn surdà uffizialmain en il rom da la radunanza generala da la SRG.R ils 10 d’october 2020 ad Andeer.

video
Premi SRG.R 2020 va a Tarcisi Hendry
Or da RTR Social dals 29.09.2020.
laschar ir

RTR novitads 10:00

Artitgels legids il pli savens

Scrollar a sanestra Scrollar a dretga