Il plevon ha Tujetsch ha benedì l’unimoc vegl, renovà da nov, dals Pumpiers Sursassiala. Restaurà quel e reconstruì per part ha la Rosenbauer Svizra SA, ina firma internaziunala cun sedia ad Oberglatt/Turitg.
Tanc, pumpa, frains e pneus novs
Sco Felix Danuser da la Rosenbauer Svizra SA di, hajan els construì in tanc ed ina pumpa nova, els hajan era restaurà il schassis e fatg frains e pneus novs, tut cun la finamira ch’il vehichel tegnia puspè 30 onns.
150'000 francs
L’unimoc saja, malgrà sia vegliadetgna, fitg bain en stan, di Gion Tenner, il cumandant dals Pumpiers Sursassiala. E perquai sajan els sa decidì da laschar renovar el. La renovaziun ha custà 150’000 francs (in unimoc nov custass tranter 400’000 e 500’000 francs).
L’avantatg è ch’i na dat betg sin fiera in vehichel cun questa prestaziun.
«Vigeli»
I saja in vehichel d’emprima intervenziun cun sistem da stizzar, cun stgala per deliberar persunas e cun ina pumpa d’aua da 1'200 liters. In grond avantatg è ch'el è stretg e po uschia passar streglias e vias da guaud. L’unimoc sa numna «Vigeli» tenor il patrun da la plaiv da Tujetsch. Medel ha in «Martin» e Mustér in «Gion».