Il project per la pendiculara che maina da Sedrun via Cungieri sin il Culm da Vi en il territori da skis da Mustér è gia vegnì surdà a l’Uffizi federal da traffic per ina preexaminaziun. Sco il directur da las Pendicularas Mustér ha ditg a Radiotelevisiun Svizra Rumantscha, saja il project vegnì enavos curt avant Nadal cun intginas remartgas per meglierar. Fin tar ina hajan els pudì liquidar tuttas. «Per pudair inoltrar il project a l’Uffizi da traffic duvrain nus la decisiun da principi da la vischnanca da Tujetsch, che nus survegnian il dretg da bajegiar per las pitgas da la pendiculara, ed era per dastgar ir sur lur parcellas vi cun la pendiculara» declera Büchi.
Anc betg pront per ina decisiun
La vischnanca da Tujetsch ha tenor il president communal Beat Roeschlin plaschair da quest’idea. La vischnanca na possia dentant anc betg prender questa decisiun da principi. La raschun è la procedura d'approvaziun dal plan 1 (PGV1). «Cun quai schessan nus gea, nus essan d’accord cun tut. Ma sco emprim sto la finanziaziun esser segirada», declera Roeschlin.
Il chantun e la Confederaziun n’hajan anc betg decidì definitiv lur cumpart. Ni per la colliaziun dal territori da skis da Sedrun ed Andermatt ni per la pendiculara sin il Culm da Vi. Omadus projects vegnian tractads dal chantun e da la Confederaziun en in sulet pachet, di Roeschlin. In tal engaschi da chantun e Confederaziun pretendia da las vischnancas ina garanzia per l’emprest da la Confederaziun als dus manaschis. Tujetsch stoppia dentant l’emprim sclerir con gronda che quella garanzia dastga insumma esser, per ch’ella saja supportabla per la vischnanca.
Vitiers vegn il fatg che la vischnanca stuess surpigliar il manaschi sch’i avess da dar indizis che quel pudess ir concurs. La sa tschenta per exempel la dumonda, tge part dal territori da skis da Sedrun-Andermatt che la vischnanca avess da manar. Be la part sin il territori dal Grischun ubain era parts sin il territori da l’Uri. Tenor Roeschlin sto tut quai esser sclerì avant che la vischnanca possia decider insatge. Ils discurs cun il chantun èn proximamain.
Planisaziun locala
Per pudair construir la pendiculara dovra quai era ina revisiun da la planisaziun locala. Quella sajan ins londervi da realisar, di Roeschlin. Cura ch’il pievel ha da decider en chaussa n’è dentant betg enconuschent.
Nagut cunter la veglia da Tujetsch
Tar las Pendicularas Mustér sentan ins in pau malcuntentientscha, perquai ch’il project na po betg vegnir realisà en il tempo giavischà. Tenor Büchi avess ins gugent cumenzà questa stad cun las lavurs. Ma quai n’è betg pussaivel. Per las Pendicularas Mustér èsi cler: «Sche nus percurschain che la populaziun da Tujetsch na vul betg la pendiculara u che la politica blochescha il project, lura na realisain nus betg la pendiculara» declera Büchi.