Siglir tar il cuntegn

Header

Frank Bruns
Legenda: Planisader da traffic Frank Bruns che ha fatg e preschentà il studi davart ina colliaziun da tunnel tranter la Sursassiala e la Svizra centrala. RTR, G. hosang
cuntegn

Surselva Tunnel tranter Sedrun ed Amsteg custass almain 1,8 milliardas

In tunnel d’autos da Sedrun ad Amsteg è la varianta la pli adattada per la Sursassiala. A questa conclusiun vegn il studi che las vischnancas da Tujetsch, Mustér e Medel han laschà far suenter che cusseglieras e cussegliers da Mustér e Tujetsch han inoltrà ina moziun l’entschatta 2014.

Dir cumbat per pudair realisar in tunnel

mad
Legenda: Variantas per tunnels tranter la Sursassiala e l'Uri. Carta geografica cun las variantas per tunnels tranter Tujetsch e Mustér e l'Uri

En damain che in’ura cuntanschess ins Lucerna, sch’i dess in tunnel d’autos da Sedrun ad Amsteg. Il tunnel avess ina lunghezza da 12 kilometers e custass 1,8 milliardas francs. En tut intercurescha il studi, 11 variantas da tunnels che mainan da Tujetsch a Göschenen, Wassen ed Amsteg ubain da Mustér ad Amsteg.

Entant che las variantas dals tunnels da viafier custan pli pauc, numnadamain tranter 1 ed 1,5 milliardas, na vegn ins betg da reducir il temp da viadi sut in’ura ed era betg da cuntanscher ina valur economica uschè auta sco cun ils tunnels d’autos.

Las investiziuns dal tunnel na stattan betg en relaziun cun il niz da quel.
Autur: Franc Brunsplanisader da traffic ed autur dal studi

Per il tunnel d’auto proponì en il studi vegn quintà cun ina plivalur economica da 6 milliuns francs per onn. Tenor il planisader da traffic Frank Bruns che ha fatg il studi na stat l’investiziun betg en relaziun cun il niz. Ma el manegia era che las cifras pudessan daventar secundaras, sch’i dettia politichers che s’engaschian fitg ferm per il project e cumbattian tant tar il chantun sco er tar la confederaziun per questa colliaziun.

Idea na duai betg svanir en truclet

Frank Bruns cusseglia plitost d’impunder las forzas per meglierar quai ch’è avant maun u forsa schizunt per far reponderar la confederaziun il project da la Porta Alpina. Malgrà ch’il studi n’empermetta betg grondas schanzas per in tunnel da la Sursassiala vers la Svizra Centrala na vulan ils presidents da vischnanca betg metter l’idea en truclet. Sco il president da vischnanca da Mustér Francestg Cajacob ha ditg sesian ils presidents da las trais vischnancas da Tujetsch, Medel e Mustér ensemen per decider co vinavant.

Ina realisaziun d’in tal project dovra tenor Frank Bruns almain 15 onns a partir dal mument ch’il chantun e la confederaziun sustegnan il project.

RR novitads 06:00

Artitgels legids il pli savens

Scrollar a sanestra Scrollar a dretga