Tunnels da Medel: Evitar che tocca da la grippa vegn sin via

Ina firma spezialisada è en acziun sin il tschancun tranter Fontanivas ed il tunnel da Val da Rein. Il chantun respectiv l’Uffizi da construcziun bassa ha incumbensà l'interpresa da segirar quest tschancun.

Lavurs vid il grip Bild in Lightbox öffnen.

Legenda da maletgs: Lavurs vid il grip RTR, H. Giger

En plirs lieus vegni furà rusnas en la grippa. Alura vegnan ancras fixadas per ch’ils lavurers possian fermar las raits. Els schubregian dentant era la grippa, vul dir els fan vegnir giuadora tocca ch'è lucca e crappa. Las raits vegnan fermadas sin in tschancun da 250-300 meters ed ina surfatscha da 3'700 meters quadrats. Sco Damian Marino da l’Uffizi da construcziun bassa di, saja quai la suletta pussaivladad da meglierar la segirtad sin via.

Ina firma spezialisada fa questas lavurs Avrir maletg en lightbox.

Legenda da maletgs: Ina firma spezialisada fa questas lavurs RTR, H. Giger

Surtut per meglierar la segirtad dals velocipedists

Las lavurs vi da la grippa vegnan fatgas surtut era per ils velocipedists che van pli e pli savens sur il Pass dal Lucmagn. Quellas lavurs han cumenzà mez d'october e cuzzan fin curt avant Nadal. Mintga trais fin quatter onns ston ils lavurers silsuenter allontanar la crappa en las raits.

Tranter 35 e 40 milliun francs

En ils tunnels da Medel investescha il chantun il mument tranter 900’000 ed 1 milliun francs. Tenor Damian Marino haja il chantun gia investì ca. 10 milliuns francs tranter Salaplauna /Mustér ed ils tunnels da Medel; ed ils proxims onns vegnian anc investì da quai da 25 fin 30 milliuns francs.

RR actualitad 17:00