«Jau sun tut agitada», di la guida e manadra dal post d'infurmaziun tar Surselva Turissem Alice Bertogg avant la tura sonora a Glion. Surselva Turissem preschenta ensemen cun «mira cultura» per l'emprima giada sia nova tura tras Glion «Glion tuna e resuna – der Klang der Surselva.»
-
Bild 1 von 2. Radund 20 persunas èn sa radunadas sin la plazza cumin a Glion. Bildquelle: RTR.
-
Bild 2 von 2. Las ultimas preparativas, avant ch'i vegnia serius. Bildquelle: RTR.
Quant gnervusa che la guida e responsabla per la cultura da Surselva Turissem Alice Bertogg è, na sent'ins betg, cura ch'ella è sin la plazza cumin a Glion e beneventa las var 20 persunas. Guids e guidas e represchentantas e represchentants da las medias èn sa radunads davant las duas guidas Alice Bertogg ed Ursula Brändli Capaul.
La tura maina tras sis differents lieus a Glion. E l'emprima fermada è la baselgia catolica, paucs meters sper la plazza cumin. Fatschas interessadas guardan sin las duas guidas che stattan davant l'altar. Ed i na va betg ditg, fin che la gruppa chanta per l'emprima giada.
Surselva turissem e la purschida da turas «mira cultura» han elavurà questa tura. I vegn chantà differentas chanzuns rumantschas, sco Alice Bertogg declera.
Jau crai che mintga Sursilvan e mintga Sursilvana ha chantà baud u tard ina giada. I dat da quels che chantan fitg fitg bler, e da quels che chantan mo fitg bler. Ma jau crai che quai è en nossa DNA.
Suenter la visita en baselgia vai vinavant sper il Rain e sut la staziun ora. Las ramurs van ina sur l'autra ora, enfin ch'ins auda mo pli ina maschaida da tuns. La manadra da cultura Ursula Brändli Capaul na para betg dal tut cuntenta. Ella declera: «Nus avain pensà ch'i tuna bain sut la staziun. Ma ussa avain nus sentì ch'i dat era anc bleras autras ramurs che disturban magari.»
-
Bild 1 von 5. La gruppa chanta en la baselgia catolica. Bildquelle: RTR.
-
Bild 2 von 5. Bildquelle: RTR.
-
Bild 3 von 5. La tura va vinavant sper il Rain ora. Bildquelle: RTR.
-
Bild 4 von 5. Sut la staziun hai bleras ramurs: ils trens, glieud estra ed annunzias dal tren. Bildquelle: RTR.
-
Bild 5 von 5. Bildquelle: RTR.
La tura va vinavant tras la citad veglia en la baselgia refurmada, nua che la gruppa gioga sin differents scalins che las manadras han purtà. Suenter in'ura e mesa sa raduna la gruppa davant il Museum regiunal Surselva, nua che la tura è a fin. Il resun da las participantas e dals participants para positiv. «Il meglier hai plaschì da chantar ensemen», di ina dunna.
Chantar è adina bel. Gist cun tals experiments sco quai che nus avain fatg ussa cun differentas acusticas e persunas ch'ins n'enconuscha betg. Jau chatt fitg bel – in'ura e mesa da giuidair.
I dat dentant era propostas per midadas. In um avess giavischà da gia pudair chantar en sin plazza cumin, ed ina dunna pli veglia manegia ch'ins avess pudì udir anc dapli ramurs sco il traffic tras Glion, ils plazzals u era la Rega che sa tschenta sin il tetg da l'ospital. Per la guida da cultura Alice Bertogg è il facit da questa emprima tura dentant cler: «Jau ma legrel enorm!»
-
Bild 1 von 3. La gruppa va er en la baselgia refurmada da Glion. Bildquelle: RTR.
-
Bild 2 von 3. Era qua vegn chantà. Bildquelle: RTR.
-
Bild 3 von 3. Bildquelle: RTR.
La finiziun da la tura sonora è l'exposiziun permanenta dal Museum regiunal Surselva, deditgada als tuns, al chant ed a la musica da la Surselva. Questa nova exposiziun permanenta vegn averta il zercladur 2026.