La dumbraziun dals tschiervs succeda mintg’onn cura ch’ils prads en las vals entschaivan a vegnir verds. Quai carmala natiers la selvaschina. Dumbrà vegn sistematicamain, uschia èn ils resultats cumparegliabels cun ils onns avant.
Anc adina in aut dumber
En il district da la Cadì èn vegnids dumbrads quest onn 1'061 tschiervs, en il district da la Lumnezia/Foppa 953. En omadus districts èn vegnids registrads damain tschiervs, quai ha constatà il manader dal district da chatscha Cadi Ueli Jörimann. Ina da las raschuns saja la buna chatscha dals ultims onns ch'ha gidà a stabilisar, respectivamain decimar la populaziun. Lura haja er la preschientscha dal luf in pign effect. Quel chaschunia moviment, dentant da decimar la populaziun na vegnia quel betg.
Ils resultats da la dumbraziun da tschiervs servan als plans da chatscha. Sin fundament dad els vegn decidì il dumber ch'è da sajettar durant la proxima chatscha.