La vischnanca da Tujetsch ha visà il contract cun Sedrun Mustér Turissem. Per l'organisaziun turistica sisum la Surselva savess quai muntar la fin. L’Uffizi per economia e turissem dal Grischun (AWT) è gia dapi in temps en discurs cun ils differents partenaris che furman quella regiun turistica.
Adina communablamain Mustér e Tujetsch
«Per nus è quai ina surpraisa che Tujetsch fa ussa quest pass», ha ditg Michael Caflisch, il manader dal svilup turistic.
Discurs haja quai anc dà las davosas emnas. Perquai saja la surpraisa ton pli gronda che la vischnanca da Tujetsch viseschia ussa il contract cun Sedrun Mustér Turissem.
«Tut quels discurs fin ussa han adina mussa ch’ins è pronts dad ir ensemn en ina direcziun», uschia Caflisch. «Quai tant ensi encunter Andermatt ni engiu encunter Surselva turissem, dentant adina communablamain Mustér e Tujetsch.»
Nov en questa chaussa è l’opziun da forsa sa colliar cun Surselva Turissem. Surselva Turissem è l'organisaziun che cumpiglia Breil Sursaissa Lumnezia e Glion.
Sto succeder sin basa voluntaria
Per il AWT èsi cler che las organisaziun turisticas ston avair ina grondezza minimala, e che sa separar è la fallida direcziun. Mo hajan els naginas pussaivladads da sfurzar insatgi tar ina collavuraziun. Quai stoppia succeder sin basa voluntaria.