Siglir tar il cuntegn
cuntegn

Surselva Ultim Open Air Trun

25 giadas hai gì num «Open Air Trun» sin il plaun Rensch. La maxima: musica e divertiment, pitschen e famigliar. Quest onn datti l'ultim'ediziun da la festa locala ch'è naschida sut l'ensaina dal ballape.

Il plazzal da festa cun las fuainas per star da cuminanza.
Legenda: Il plazzal da festa cun las fuainas per star da cuminanza. RTR, L. Livers

Igl è l’onn 1990, l’onn dal campiunadi mundial da ballape en l’Italia. Sin il plaun Rensch a Trun vegn per l’emprima giada organisà in uschenumnà public viewing, nua che in e scadin po guardar communablamain ils gieus da ballape.

Bainbaud è quai eveniment sa sviluppà. E dus onns pli tard è vegnì organisà l’emprim Open Air Trun – cun musicas e divertiment durant dus dis. Dapi lura dai da 25 ediziuns da questa festa sut tschiel avert. Il 2016 marca la dernière per l’Open Air Trun. Ed er quest onn vegnì puspè giugà ballape.

Cumenzar e finir sut l'ensaina dal ballape

Marcus Steiner, il president da l’uniun Open Air Trun, manegia ch’il di dals 25 da zercladur era gia daditg fixà. Uschia èsi plitost casualitad e cletg che la Svizra gioga gist quest di a l’EURO 2016. La partida tranter la Svizra e la Pologna pudess bain carmalar inqualin al Plaun Rensch: I dat numnadamain er quest onn in public viewing sco l’onn 1990.

L’Open Air Trun ha mai gì il desideri da pudair concurrenzar cun ils gronds open airs. El è adina stà ina festa pli pitschna, pli famigliara. Che l’open air haja survivì 25 onns saja be d’engraziar a singuls ed er a l’uniun, di Marcus Steiner. El deplorescha ch’el ha stuì prender la decisiun da laschar murir l’Open Air Trun.

RR actualitad 06:00