Il matg avant in onn aveva la radunanza communala da la vischnanca Schluein refusà il credit da 100'000 francs per l’uniun «Löwenberg – Surselva impact lab». Questa giada èn 38 da las 59 persunas preschentas cun dretg da votar s’exprimidas en favur dal project. Quai saja fitg legraivel ha ditg Ralph Schlaepfer, il president da vischnanca suenter la radunanza. Probabel haja la populaziun vis che las lavurs da renovaziun e sanaziun cuntinueschan e che las emprimas interpresas han prendì dimora en il chastè, ed uschia pudì sustegnair il project, uschia Schlaepfer.
L’uniun Löwenberg vul renovar e dar dimora ad interpresas giuvnas en il chastè. Las lavurs da renovaziun e sanaziun vegnan stimadas sin radund 5 milliuns francs, radund la mesadad sajan vegnids rimnads tras donaziuns, uschia èsi vegnì preschentà a la populaziun da Schluein. Cun il sustegn da la vischnanca vegn uss era il chantun a pudair sustegnair il project, pertge il sustegn da la vischnanca era ina da las premissas per dar daners chantunals.
Novas structuras communalas
Era ha la radunanza da vischnanca da Schluein approvà la nova organisaziun communala. Quella prevesa da professiunalisar las structuras e da surdar dapli cumpetenza surtut era finanzialas als gremis communals. Surtut duai vegnir creà ina direcziun che reglescha ina part dals pensums oz fatgs da la suprastanza. Uschia duai esser pussaivel da reducir las sedutas da suprastanza e far pli attractiv uschia quests posts ch’èn grevs d’occupar. La fusiun na stettia betg en discussiun cun far quai pass, anzi veglian ins porscher a la populaziun cun las structuras novas propi in'alternativa per il futur, surtut sche la fusiun na vegniss ord tge raschun era adina betg realisada.
Elecziuns dal president
Era ha il president Ralph Schlaepfer suenter trais onns en uffizi, stuì vegnir confermà. En tut ha el survegnì 33 vuschs tar in pli absolut da 26. Era è vegni confermà en suprastanza Corsin Bearth e da nov plaz en suprastanza prenda Remo Wellinger, quai suenter che Gabi ter Braak-Schmid aveva demissiunà.
