L’idea è vegnida a Giachen Caduff cura ch’el ha vis ina ura da pleds fatga sezza per dialect tudestg svizzer. Ses collega ha alura intimà el da far ina sez per rumantsch. Ditg e fatg, suenter pliras emprovas èsi alura reussì al giuven bab da famiglia da far ina tala ura da pleds per sursilvan. Quai tut sco hobi e betg per vender. Sia famiglia ma era las visitas han laschà plaschair sia ura e perquai ha el fatg talas era per els. Ma reclama per l’ura da pleds n’ha el fin uss betg fatg grond.
Grazia a preschentaziun dapli reclama
Sin invit dals responsabels dal curs d’emprender rumantscha a Glion ha Giachen Caduff preschentà ses project ad in public pli grond. Perquai haja el alura creà ina pagina d’internet ed ina pagina sin las medias socialas. Ma betg per viver in di dal vender uras, lezza opziun saja pauc realistica, di l’um ch’abitescha cun sia famiglia a Glion. Per esser sin la vart segira ha el laschà examinar da duas persunas independentas la situaziun cun dretgs e patents e lez han confermà che quai na saja betg problematic. Fin uss n’haja el era betg survegnì reclamaziuns per ses hobi, anzi blera glieud haja plaschair vi da quellas uras ed el sez era.
Affinitad per electronica d’avantatg
El haja emprendì d’electricist e perquai era ina tscherta affinitad per tala tecnica, quai saja d’avantatg ma betg ina premissa. Las sfidas sajan stadas da posiziunar ils bustabs là nua ch’i dovra els per pudair leger il temp e gliez haja duvrà pazienza. Ma quai saja sco cun tut, sch’insatge na gartegia betg direct alura hai num anc empruvar ina giada e gliez haja el stuì far pliras giadas, uschia Giachen Caduff. Per pudair programmar l’ura dovri ina applicaziun e lezza ha el era fatg per rumantsch e la finala plain motivaziun era ils manuals. El na saja betg s’occupà bler cun lingua, ma la finala saja quai surtut stà per el in giavisch da vulair far tut per rumantsch e cun agid saja quai reussì ed uss pront per persunas che giavischan da cumprar ina tala ura da pleds.
