Urs enavos en Surselva

135 onns suenter ch’il davos exemplar è vegnì sajettà en Surselva è l’urs turnà en Surselva. Sin territori da la vischnanca da Trun èsi reussì a la surveglianza da chatscha da filmar el.

Laschar ir video «L'urs è turnà en Surselva»

L'urs è turnà en Surselva

0:10 min, dals 30.5.2016

Al guardiaselvaschina Ueli Jörimann èsi gartegià da filmar l'urs cun ina camera automatica ils 11 da matg 2016 a las 03.30 uras sin il territori da Munt sur Trun. L’urs saja stà sin viadi en direcziun Val Punteglias.

Mezdi: Urs en Surselva

1:11 min, Actualitad dals 30.05.2016

Nua che l’animal sa chatta il mument, na saja betg enconuschent, ha ditg il guardiaselvaschina e schef dal district Cadi, Werner Degonda envers l’Agentura da Novitads Rumantscha. Tenor Degonda èsi pussaivel ch’i sa tracta dal medem exemplar ch’ins haja vesì en il conturn da Spleia avant radund in mais.

Camera ha filmà l'urs casualmain

Che la preschientscha da l’urs daventa pir ussa enconuschenta, attribuescha la surveglianza al fatg che las cameras vegnian controlladas mo da temp en temp. Tar quella camera è quai succedì ils ultims dis. Però n'è la camera betg vegnida installada là pervi da l'urs, mabain pervi dal luf-tscherver.

«  En sasez èsi stà grond cletg da registrar l’urs. El è vegnì filmà d’ina camera che nus avain en quest territori da princip pervi dal luf-tscherver. »

Werner Degonda
Guardiaselvaschina

Ils 12 da settember 1881 è il davos urs vegnì sajettà en Surselva dal chatschader Josef Janka sin il territori da la vischnanca da Sursaissa.

RR novitads 06:00