La fin d'emna dals 9 e 10 da schaner ha gì lieu a Vella en la halla polivalenta l'11avel campiunadi grischun da troccas. 60 teams da 2 persunas èn sa mesirads sur dus dis per chattar ils novs campiuns grischuns. Gudagnà han ils dus trochists Urs Gautschi e Lucas Janka da Trun.
Gieus da chartas èn lur passiun
Il gieu da troccas è per Urs Gautschi sco era per Lucas Janka ina passiun. Mintga giada ch’els dattan in turnier u in campiunadi, dattan els ensemen. Il campiunadi grischun gia per la 11avla giada, pia dapi l’entschatta. Uschia na saja per els betg in problem da chapir in l’auter era senza discurrer, tenor omadus ina premissa impurtanta per avair success da dar troccas.
Preparativas curt avant il campiunadi
Cun las preparativas per il campiunadi entschaivan els pir il november. Enfin lura na dattan els betg ensemen troccas, Urs Gautschi schizunt insumma buc. Pir curt avant il campiunadi dattan els insaquants gieus, tranter auter era encunter auters giugaders che participeschan al campiunadi grischun. Ina schanza betg mo per trenar da dar troccas, mabain era per cumenzar cun gieus psicologics ed uschia forsa irritar ils adversaris.
