Dapi dapli che trenta onns datti gia ils viadis dal Camp Cadi. En emprima lingia eran ils viadis per ch’ils uffants da la Cadi possian emprender d’enconuscher la Bassa ed uschia il lieu d’origin da blers osps da vacanzas. En in segund pass èn pli tard vegnids vitiers viadis pli lungs en citads dal exteriur, il Camp Cadi 2.
Savens han ils viadis manà en Belgia. Quai ha gì da far cun il Hotel Acla da Fontauna a Mustér. Ils Beltgs vegnivan sur onns a Mustér. Duas dunnas da la Belgia che vivan anc oz a Mustér han alura era manà plirs onns ils viadis en Belgia.
In turnus da citads
Ma era las citads da Minca, Cologna, Berlin, Paris, Londra e Hamburg eran gia sin il program. E durant ils viadis stattan era la cultura e la istorgia en il center. Uschia datti per mintga di in program, savens cun visitar ina attracziun. Quest onn per exempel cun visitar il port da mar da Antwerpen u era il camp da guerra da l’emprima guerra mundiala.
Fundà da las plaivs
La plaiv refurmada da la Cadi cun dimora a Mustér ha inizià 1986 ils viadis per uffants e giuvenils. Il 1992 è la plaiv catolica da Mustér sa participada e a partir dal 1996 tut las plaivs da la Cadi. La religiun na gioghia dentan betg ina rolla centrala. Mintgina e mintgin saja bainvegnì en il camp. La suletta premissa saja la vegliadetgna sco era d’avair dimora en la Cadi, di Gion Tenner che accumpogna ils camps dapi il 1992.
RR actualitad 11:00