Siglir tar il cuntegn
cuntegn

Surselva Val: Avert per model da finanziar las pendicularas

La populaziun da Val sustegna il nov model da finanziaziun per garantir ch'i dat er en l'avegnir las pendicularas. Quai mussa ina retschertga che las pendicularas han fatg ensemen cun la vischnanca. Las pendicularas cumbattan dapi onns cun cifras cotschnas.

pendiculara cun gondlas, di d'enviern, bell'aura
Legenda: Las pendicularas han dapi blers onns difficultads finanzialas. RTR, Linus Livers

Il nov model prevesa ch'ils indigens ed ils giasts che pernotteschan a Val pon duvrar ils runals gratuitamain. La finanziaziun duai succeder sur contribuziuns pauschalas da la vischnanca, dals possessurs d'abitaziuns secundaras e da la hotellaria.

Il fanadur 2017 è il project per il nov sistem da finanziaziun vegnì sin maisa. Sinaquai han la vischnanca, «Visit Vals» e la «Sportbahnen Vals SA» sviluppà in nov model da finanziaziun e mess quel en discussiun. Radund 800 chasadas cun totalmain 558 persunas èn sa participadas a l'enquista online. Tant ils indigens sco er ils possessurs d'abitaziuns secundaras èn cunter da serrar las pendicularas, e refusan er da laschar ir concurs l'interpresa.

Sco quai che la vischnanca communitgescha veglian ins ussa optimar il model e preschentar quel la primavaira.

RR novitads 14:00