Sco Arno Puorger da l’Uffizi da chatscha e pestga dal Grischun ha ditg, dettia indizis ch’il luf saja involvì. Els sappian che lufs eran en vischinanza ils ultims dis. Plinavant hajan ins chattà ina nursa cun ina morsa en il culiez. Quai na saja dentant betg ina da las nursas ch’èn crudadas.
In dals emprims che ha vis las nursas crappadas è stà il chau d'alp Christian Unterholzner. I saja stà in «massacher», cura ch'el saja arrivà al lieu. Per el èsi cler ch'in u plirs lufs sajan la culpa per la crudada da las 71 nursas. Ils mussaments menziunads èn per el clers.
Cler è ch'il cas en la Val Cristallina saja extraordinari pervi dal dumber da nursas crappadas, sch'ins giaja da quai anora ch'i saja propi stà in ni plirs lufs.
Vegnan nursas indemnisadas?
Sch'i dat indemnisaziuns per las nursas crappadas n'è anc betg dal tut cler. L'indemnisaziun sa basa sin la valitaziun dal guardia-chatscha, sch'il luf era involvà u betg, di Arno Puorger. En quest cas dettia bain indizis ch'il luf saja il culpant, uschia ch'i dess indemnisaziuns. Ma emprim saja anc da far intginas inqusiziuns. Tenor las emprimas infurmaziuns saja da partir dal fatg ch'i n'haja en mintga cas betg dà sbagls tar la protecziun da las nursas.
Daltut cler, sche lufs sajan la culpa per la crudada da las 71 nursas, n’èsi anc betg. Ins saja vi da las investigaziuns. Relevant, sch'il luf ha chaschunà questa crudada èsi era, perquai che lura pudess l'Uffizi per chatscha e pestga quintar las nursas sco unfrendas dal luf. Uschia ch'i pudess resultar in cas per ina regulaziun.
