Siglir tar il cuntegn
Inhalt

Surselva Val: Davosa saira d’infurmaziun «Na, Nein, No Parc Adula»

Ils adversaris han preschentà lur arguments, ina discussiun critica sur da quels arguments n'hai dentant betg dà.

En 1 emna decidan ils abitants da 17 vischnancas pro ni contra il Parc Adula.
Legenda: En in'emna decidan ils abitants da 17 vischnancas pro ni contra davart il Parc Adula. Keystone

A Val ha gì lieu venderdi ils 18 da november la davosa saira d’infurmaziun dals adversaris dal parc naziunal Parc Adula, il comité «Na, Nein, No Parc Adula».

Vers 150 persunas èn stadas preschentas, per gronda part adversaris dal Parc. Era ils referents e las persunas ch'han prendì il pled èn tuttas s’exprimidas encunter il parc.

Arguments enconuschents

Ils arguments encunter il parc ch’èn vegnids menziunads durant la saira èn gia enconuschents. Plirs referents han menziunà che

  • cun sias leschas e prescripziuns prendess il parc als abitants da las regiuns pertutgadas la libertad
  • en in parc avessan las organisaziuns d'ambient anc dapli pussanza per impedir projects
  • la zona circumdanta na fiss insumma betg senza novas leschas, sco quai ch'ils aderents dal parc pretendian adina

I n’ha dentant betg dà ina discussiun critica sur dals arguments encunter il parc. Ed era ils arguments dals aderents dal Parc Adula n’èn betg vegnids discutads.

Dumondas criticas betg acceptadas

Vers la fin da la saira d’infurmaziun ha il public gì la pussaivladad da tschentar dumondas. Quai han era dus aderents dal parc vulì far, tranter auter Sep Cathomas, il president da la gruppa Pro Parc Adula Surselva. L’organisatur da la saira d’infurmaziun, Pablo Maissen dal comité Na, Nein, No Parc Adula, n’è dentant betg entrà en la discussiun ed ha spert dà vinavant il pled ad adversaris dal parc. El haja agì aposta uschia, quai saja stà ina saira d’infurmaziun dals adversaris ed el na vuleva betg dar ina plattafurma als aderents, uschia Maissen.

La vischnanca da Val decida venderdi, ils 25 da november, durant ina radunanza communala sur dal Parc Adula.

RR actualitad 08:00