Siglir tar il cuntegn

Header

cuntegn

Surselva Val: Decisiun per la pasch

Il suveran da Val ha decidì da bajegiar ina atgna halla da gimnastica e d’acceptar che la 7132 SA da Remo Stoffel contribuescha mo 4,5 milliuns francs enstagl da 6 milliuns francs.

Cun 260 vuschs gea cunter 71 vuschs na ha la radunanza communala da Val decidì da projectar in'atgna halla da gimnastica e da betg bajegiar ina traidubla halla polivalenta ensemen cun la 7132 SA da Remo Stoffel.

En il contract da cumpra per il Hotel Therme aveva Remo Stoffel acceptà da pajar 6 milliuns francs per ina nova halla polivalenta sut la cundiziun che la vischnanca paja la medema summa.

In portrait da l'architect Tadao Ando.
Legenda: Tadao Ando - l'architect giapunais che vegn activ a Val S. Pieder. Keystone

Nagin interess e plaz per ina halla traidubla

En il lieu fixà per la halla polivalenta vegn uss dentant realisà entras la 7132 SA il parc «Valser Path» dal architect giapunais Tadao Ando. La halla traidubla n’ha betg pli plaz. Era la vischnanca ha fatg ina analisa dals basegns da las uniuns localas de è vegnida tar la conclusiun ch'ina halla simpla tanscha per cuvrir quests basegns.

Per quest motiv ha la suprastanza communala fatg la proposta da bajegiar in'atgna halla - senza participaziun da la 7132 SA. Lezza percunter po deducir p.ex. la valita dals dretgs d’utilisaziun, ch’ella avess gì tar ina halla communabla.

Uschia sto la 7132 SA mo pli pajar 4,561 milliuns francs enstagl da 6 milliuns francs.

audio
Bunura: Val - Votaziun halla polivalenta
ord Actualitad dals 19.03.2016.
laschar ir. Durada: 3 minutas 22 Secundas.

La pasch duai returnar el vitg

Per ina gronda part da las votantas ed ils votants ch'eran a la radunanza communala eri impurtant ch’il tema da la nova halla polivalenta, che stat en connex cun la vendita dal Hotel Therme, vegnia finalmain terminà.

I haja gia dà memia bleras discussiuns e dispitas en il vitg pervia da quai. I saja temp da serrar quest chapitel e da puspè planisar il futur ensemen, han bleras persunas ditg suenter la radunanza.

Artitgels legids il pli savens