Siglir tar il cuntegn

Header

cuntegn

Surselva Val Lumnezia: pli attractiv per plazs da lavur

Ina da las finamiras da la Pro Val Lumnezia è da far pli attractiva la Val Lumnezia per novas plazzas da lavur. Cun questa finamira vul la Pro Val Lumnezia dar cuntrapaisa a la depopulaziun.

audio
Pro Val Lumnezia vul s’engaschar per l’attractivitad da la Lumnezia sco plaz da lavur
ord RTR Audio dals 28.10.2015.
laschar ir. Durada: 2 minutas 49 Secundas.

Sch'i dat plazzas da lavur en la Val Lumnezia, lura banduna e pli pauca glieud la Val, da quai è Silvio Capeder, il president da la Pro Val Lumnezia persvas. Perquai vul l'uniun s'engaschar per pudair crear plazzas da lavur persistentas. Quai pudess esser plazzas da lavur da secretariat per fatschentas en la bassa ubain era plazzas da lavur nua ch’i basegnia inschigners che pon dentant far lavurs decentral, declera Silvio Capeder.

Pli savens en la Val Lumenzia

En discurs cun gists da vacanzas haja la Pro Val Lumnezia constatà la tendenza ch'i vegn giavischà adina dapli da avair la pussaivladad da pudair lavurar in u l'auter di durant las vacanzas. Cun metter a disposiziun infrastructura sco biros, dentant era bunas colliaziun d’internet pudess la Pro Val Lumnezia s’imaginar che quellas persunas prolungassan ubain faschessan pli stedi vacanzas cun lur famiglias en la Val Lumnezia. Quai purtass plivalur en la val e forsa ch’in u l’auter vegniss insumma ad abitar en la Val Lumnezia, di Silvio Capeder. Tenor el pudessi quai avair in effect ch’il contact cun tschertas fatschentas pudessi era procurar per ulteriuras plazzas da lavur ed uschia dess quai ina multiplicaziun.

Anc nagins projects concrets

Cun in tal svilup, manegia Silvio Capeder, ch'ins pudess era franar la depopulaziun ed a lunga vista era puspe scolar dapli la giuventetgna en la regiun. Anc n’èn dentant nagins projects concrets sin maisa ed ina finamira sin cura ch'ins vul avair creà quantas plazzas da lavur en Val Lumnezia na datti era anc betg. Sco Silvio Capeder punctuescha dentant stoppia quai sa sviluppar e crescher per ch'i saja la finala persistent e porti insatge a la val.

Artitgels legids il pli savens