Siglir tar il cuntegn

Header

cuntegn

Val Medel Ils Trais Sontgs Retgs vegnan anc – era senza scola

Avant dus onns ha la scola primara da Medel serrà las portas. Dapi lu van ils uffants a Mustér a scola. L’usit da chantar da retgs è dentant cun engaschi da blers sa mantegnì, almain per il mument.

audio
Mezdi: Medel: Er senza scola chantan ils Trais Sontgs Retgs
ord Actualitad dals 06.01.2020.
laschar ir. Durada: 2 minutas 52 Secundas.

Set giuvnas che chantan gugent

Sco l’anteriura scolasta a Curaglia Evelina Giger di, saja ella sa declerada pronta da sa gidar. Ma l’iniziativa da far vinavant cun l’usit saja surtut vegnida da las giuvnas sezzas cun sustegn dals geniturs. Uschia n’haja ella betg pudì dir na cura che las giuvnas han dumandà sch’ella mussia las chanzuns ad ellas.

Speranza che l’usit sa mantegn

Per l’auter onn quinta la scolasta, che dat uss scola en ina autra vischnanca en Surselva, che las giuvnas vegnan anc ina giada a chantar en la medema furmaziun. Alura vegnian ins anc a pudair cuntinuar cun ina gruppa pli pitschna. Ma silsuenter vesi quai ora mender, pertge ils uffants manchian en la val.

video
Sontgas Reginas a Medel: Video è fatgs da Ciprian Giger
Or da Giuventetgna dals 06.01.2020.
laschar ir. Durada: 1 minuta 40 Secundas.

Agid da la scola Mustér

Sco Evelina Giger di saja la scola da Mustér gia sa drizzada l’onn passà ad ella ed haja dumandà sch’ella pudessi chantar en cun las mattas. Alura sajan quellas vegnidas dad ellas anora per l’agid ed uschè ditg che quai constettia vegnia ella a cuntinuar. Era haja ella cumplaina chapientscha ch'il usit stettia er a Mustér sin chommas falombras, pertge ils retgs a Mustér cumenzan gia la gievgia a chantar e termineschan lur tur la dumengia e sche la val Medel vegniss vidlonder alura duvrassi probabel dapli che las trais actualas gruppas da retgs a Mustér.

RTR actualitad 11:00

Artitgels legids il pli savens