Simpla n'è la decisiun da chalar betg stada, di Linus Flepp. Adumbatten ha el e ses collavuraturs tschertgà insatge che cuntinuescha. Las bleras persunas dumandadas han respect da scriver, era sch’els han adina fatg amogna da curreger ils texts, n'è nagin stà pronts da cuntinuar, di Linus Flepp.
In dals arguments è ch’ins n’ha betg avunda material per scriver ed edir quatter giadas ad onn la revista, di Linus Flepp, ma qua è el dal avis ch’ins avessia era pudì schlargiar ils temas sur la val Medel ora, ma quai n'è betg stà giavischà. L’ultima ediziun è vegnida fatga cun dus carnets, quai ch'è stà ina surpraisa per el, quai mussia ch'il material na manchia betg, di Linus Flepp.
Bellas entupadas e discurs
La finamira è adina stada da pudair dar la redacziun en mauns pli giuvens, pertge cun mirar enavos sin quels dus decennis, ha quai dà bleras bellas entupadas e discurs per scriver la revista. Ma en il temp dad oz èsi grev da chattar idealists che fetschian la lavur senza survegnir daners e simplamain or da plaschair, di Linus Flepp. Per el restan surtut ils bels muments en regurdientscha e tut va ina giada a fin, era sche quai fa mal.
Daners na restan betg blers
La communicaziun da betg pli edir en l'avegnir ils «Piogns» hajan els gia fatg avant in onn cun l’avis da betg pli pajar la contribuziun annuala. Uschia na restia betg bler en cassa e quai saja bun uschia, di Linus Flepp.